Nalangan nga kabuntagon

Gula 83

Unya, may laing misantop sa hunahuna ni Destiny. Gibati niya ang kahingawa pagkahinumdom niya kang Evan.

“S-si Kuya Evan, Mom,” ni Destiny pa sa tingog nga nagdahik sa kaluya. “H-hain si Kuya Evan?”

“Naa sa pikas lawak si Evan,” maoy tubag. “Luwas na usab sa kakuyaw ang iyang kahimtang. Pero sama nimo, luya pa usab siya kaayo. Bag-o pa sab nga gibalikan sa panimuot.”

Wala na usab motingog si Destiny. Milugak og diyotay ang iyang kahingawa pagkasayod nga buhi si Evan. May diyotay’ng kalipay nga mihapuhap sa iyang balatian. Nagpasalamat siya sa hilom nga naluwas usab si Evan gikan sa kamatayon.

“Nganong inyo man kining gibuhat?” Gikan ni Mrs. Galasi. “Tungod sa nahitabo ninyo, diriyot usab madisgrasya ang inyong daddy. Giatake siya sa high blood pagkasayod nga naghikog mong duha. Maayo gani kay nadali nako’g painom sa gi-maintain niyang tambal.”

Nagpabiling nagpakahilom si Destiny. Apan naglihok ang iyang hunahuna. Karon pa siya makaamgo nga dakong sayop gayod ang iyang gibuhat. Tungod sa tinguha nila ni Evan sa pagpakamatay, dili lang diay unta ang ilang kinabuhi maoy makalas kondili lakip na ang kinabuhi sa ilang amahan. Tingali, kun may daotang nahitabo sa ilang daddy ug sila ang nabuhi, dili sila papahuwayon sa ilang konsensiya hangtod sa hangtod. -- Sumpayan pa