Pakyas nga minaru

Sabado sa buntag. Nigawas si Colin sa ilaha. Nipadulong sa karsada. Nangita’g kaestambayan sa daplin sa Don Suico Street baryo Pagsabungan. Paghimuntog niya sa daplin sa karsada, dunay tawo nga nagyaka sa daplin, walang habig sa karsada. Di kabarog. Gipundokan. Bag-o lang nadisgrasya. Nagdali si Colin. Nakita niya iyang bestfriend nga si Gary. Nagkadugo ang nawong. Niduol sa hamtong nga tawo nga nagbarog duol sa nagyaka.

Nagpakisusi si Colin. Si Gary nisulti sa tanan. Nakatulog siya nga nagmaneho sa motorsiklo sa iyang uyoan. Wa siya’y lisensiya. Wa nag-helmet. Way rehistro ang motorsiklo. Tua gikuha na’s iyang uyoan ang motorsiklo. Naghulat na lang sila’g ambulansiya. May tanod na nga nagtawag og ambulansiya. Nanghambog si Gary.

"Adto siya dad-a sa Green Meadow Medical Center. Kay bayad ko bisag pila."

May gihunghong si Colin ni Gary kun unsay isulti niya mahitungod sa nahitabo. Kun kinsay mangutana, nurse, doctor o polis, mao ni iyang isulti ang iyang gihonghong. Aron di siya mapriso. Kababata ug silingan ni Gary si Colin. Barkada sila. Best friend. Igo lang silang nakahuman og hayskul. Wa sila nipadayon sa kolehiyo kay way hilig moeskuyla.

Pag-abot sa ambulansiya, gikarga ang nadasmagan. May samad sa toong bagtak. Igo kuno sa foot rest sa motorsiklo. Nikuyog ang kaubang lalaki nga hamtong na. Ang biktima trayentahon ang edad. Nikariling ang motorsiklo human sa hitabo. Si Gary nidayib ngadto sa karsada. Nikirig kadiyot. Nipilit sa sementong karsada. Nakuyapan. Pagkataudtaod, nibangon. Nagkadugo nang nawong sa mga pangos sa agtang, mga kilay, mga aping ug ilong. Apan wa niya hatagi’g importansiya iyang mga samad.

Niabot ang polis sa ospital kay gitawag sa sekyu. Medico-legal man ang problema. Giimbistigar si Gary.

"Nagpatunga man ang biktima. Akong gibusinahan, wa man nipadaplin," ni Gary ngadto sa pulis, samtang naglingkod si Gary sa katre sa Emergency Room. Ang biktima gitambalan sab sa tupad nga katre.

"Unyag nagpatunga ang tawo ug wa niurong, unsa may buhaton nimo?" sa pulis.

"Urongan!" ni Gary.

"Niurong ka ining hitaboa?" sa pulis. Wa katingog si Gary.

"Bida, mamakak pa man gyud ka. Imo mang pakasad-on imong biktima. Hubog ka, nagdrayeb way lisensiya, way helmet, way rehistro ang motorsiklo. Nakatulog ka’s kahubog. Gisugo ka’g papalit og dugang ilimnon," sa biktima nga nailhan na nga si Freddie Reyes.

"Kami naglakaw sa walang daplin, nag-agi ka’s among luyo. Nilikoy gyud ka sa among lugar aron dasmagan akong kauban," sa hamtong tawo nga nagpaila nga si Greg Conde.

"Kiha lang mo kay atubangon ta mo!" ni Gary nga hambugero gihapo’g tono.

"Mokiha, bitaw mi. Wa gyud nimo ang-anga. Abogado gyud ang testigos sa imong gidisgrasya," ni Greg Conde. Nitunol og tarheta ngadtong Gary. Nabasa ni Gary ang tarheta. "Atty. Greg Conde, lawyer/notary public."

"Mobayad ka man kaha bisag pila! Bayad na! Deposito sa ospital, doctor, tambal," sa abogado.

"Gipili nako ning hospitala kay nagdahom kong nia pa akong uyoang doctor dinhi. Nabalhin na man diay Waaa waaaa!" ni Gary. Nanglugod sa iyang mata.

"Ikaw sab! Patugatuga ka’g tudlo nako’g pamakak. Buko ra man gihapon!" gibasol ni Gary iyang higala nga naglingkod tupad niya sa wala. Nanglipaghong si Colin.

"Chief, arestoha na nang nakadasmag. Tagaan ko lang na’g tulo ka adlaw sa pag-areglo. Dublehon nila ang mabayad ni Mr. Reyes sa ospital. Kun dili, pasakaan ko siya’g physical injuries thru reckless imprudence, driving without license and helmet, drunkenness and driving a motorcycle without registration," ni Atty. Conde. Gipusasan dayon si Gary sa pulis.

"Pasayloa lang ko sir. Wa man nako tuyua!" ni Gary nga nagpanglingi ngadtong Freddy.

"Pareha ra gihapon sa gituyo nimo. Nagdrayeb kang hubog. Way lisensiya. Way rehistro imong motorsiklo. Unya namakak pa gyud ka’s pulis," ni Freddy nga nagmasahe sa iyang bagtak nga bag-o lang gibandahian.

"Waaaaa!" ngaab ni Gary samtang giagbayan sa pulis padulong sa gawas sa ospital diin ang patrol car naghuwat. Nagsigi siya’g lingi ni Colin nga nagduko ug nagpanglingo. (Kataposan)