Ang girlfriend ni Rex

Untop alas tres sa hapon dihang nidunggo ang lantsa nga gisakyan ni Rex sa Isla Limabana. Gibati siya og kagutom mao nga nidiretso siya sa may karenderiya nga duol ra usab sa dunggo-anan. Samtang siya nagkaon, misibaw ang kanta sa Nazareth gikan sa stereo sa usa ka tricycle nga nagparking kilid sa karenderiya ang "Where are you now?"

Sa iyang paminaw, mora og siya ang giigo sa matag titik sa maong awit. Mao kini karon ang iyang tuyo nganong nahipadpad siya dinhi niining maong isla, ang pagtultol ug ang pagpangita ni Florinda, ang iya kanhing hinigugma sa nagtungha pa sila sa kolehiyo. Si Rex sa kurso nga Agriculture sa CSCST samtang si Florinda sa kurso nga Pharmacy sa Southeastern University sa dakbayan sa Sugbo.

Lab-as pa sa iyang panumduman ang eksena sa katapusan nilang panagkita sa may Leslie's Fastfoods nga duol ra usab sa gitunghaan sa dalaga. Usa ka adlaw human ang graduation niini.

"Nahibalo ka Rex, unsa kita ka mahal, masulob-on nga namulong si Florinda pero kinahanglan nga atong e-call off ang atong relasyon kay gusto sa akong mga ginikanan nga adto lang ko manrabaho sa among dapit."

Wala magdahom si Rex nga mao kadto’y isulti kaniya sa dalaga. Nahugno og maayo ang ulitawo mora og moboto ang iyang dughan. Walay nahimo si Rex sa desisyon sa dalaga. Dili tiaw ang kasakit nga iyang gibati niadtong tungora.

Lisod kalimtan si Florinda, ang iyang first love. Na-miss niya ang tam-is nga mga higayon nga sila nagkauban. Ang ilang panan-aw og sine sa mabugnaw nga mga sinehan sa downtown.

Kay estudyante pa lagi, menos pa ang budget adto sila pirmi mangaon sa Larsian Barbeque. Malipayon kaayo sila nga manuroy sa Fort San Pedro sa Fuente sa Taoist Temple ug uban pa.

Aron sa pagwala sa kasakit nga gibati ni Rex nilarga kini sa Canada diin didto gi-practice ang kurso nga iyang natapos. Mga dul-an siya sa pito ka tuig didto. Sa maong gidugayon nakarelasyon siya og lainlaing mga babaye. Si Aster, usa ka caregiver, si Aileen nga usa ka pharmacist ug si Terry nga usa ka nurse, pulos mga Pinay nga tua usab nanimpalad sa Canada.

Apan para ni Rex lahi si Florinda, gawas sa kaanyag duna gayud kini talagsaong hiyas nga gihuptan nga daw magnet nga nakapadani niya og maayo. Hangtod niabot ang higayon nga nakahukom ang ulitawo nga mouli na sa Pilipinas ug pangitaon niini ang gikamingawan nga si Florinda.

Dako ang paglaum ni Rex nga libre pa ang dalaga ug naa pa siya'y luna sa kasingkasing niini. Desidido siya nga iya kining pakaslan. Sa edad nga trayenta, nakasukad na gayud ang ulitawo. Gawas sa iyang dako nga saving sa Rural Bank sa ilang dapit sa Borbon, iya usab nga napa-renovate ang ilang balay. Nakatapos sa college ang iyang mga manghod nga sila si Longlong ug Oliver pinaagi sa iyang panabang. Nalipay kaayo ang iyang mga ginikanan, ilabi na ang iyang amahan nga si Ciriaco kay iya kining gipalitan og multicab nga maoy gikalingawan og pagpamasahero niini

"Bay, akong pakyawon ang imong tricycle," ni Rex pa ngadto sa tricycle driver nga nagbasa og Banat News sa may kilid sa karenderiya." Adto ta sa sitio Kambugasok." Wala malimot ang ulitawo sa sitio nila ni Florinda kay pirmi kini kaniadto mahisgutan sa dalaga. "Sa may balay nga tisa," padayon ni Rex.

Nahibulong si Rex nga sa primero medyo nagdumili ang tricycle driver dakodako man unta ang iyang ihatag, paminaw niya nagpadugang lang kini sa pusta. Mga duha ka kilometro kapin kun kulang ang ilang biyahe dihang gihunong siya tungod gayud sa may balay nga tisa. Wala mag-usik og panahon dihang nakakanaug na si Rex ug nakahatag na sa plete misutoy dayon ang tricycle daw dunay gikahadlukan ang driver niini.

Naglibog si Rex nga kalit lang milandong ang palibot, init pa man unta ganiha. Nagtindog siya sa may gate ug nasentro ang iyang panan-aw sa balay nga tisa. Dakodako gayud ang maong balay ug karaan na kaayong tan-awon. Layo kini sa mga silingan ug mingaw kaayo ang palibot niini.

Mahinamon kaayo siyang magkakita na sila ni Florinda. Na-a pa kaha ang dalaga? Nanlimbawot ang iyang balhibo dihang may uwang sa iro nga iyang nabati ug sa kalit lang, may nilugapak sa may atubangan sa balay, usa ka higanteng kuwaknit nga nitugpa. Mora og kandila nga giugbok si Rex dihang iyang nakita nga inanay nausab ang bayhon sa maong kuwaknit, nahimo kining usa ka maanyag nga dalaga. Ug dili siya mahimo nga masayop. Ang iya kining kanhi girlfriend.

"Florinda!!! Mahal, usa ka ka aswang?" nakasinggit si Rex. (Kataposan)