Nalangan nga kabuntagon

Gula 79

Apan gipakyas nila ang ilang mga ginikanan. Nagsabak siya. Ang nakadugang sa komplikasyon mao nga igsuon niya ang nakamabdos kaniya.

Natino niya karon nga bug-os na ang hukom ni Evan sa pagpakamatay. Wala na usab siya’y laing kapilian. Dili siya makahimo sa pag-atubang sa kamatuoran nga mag-inusara. Wala siya’y igong kalig-on pagharong sa ilang mga ginikanan sa higayon nga mabutyag na ang iyang kahimtang. Mao nga makig-unong siya kang Evan. Magpakamatay usab siya!

Naghilak si Destiny nga mikuha og ballpen ug papel. Nagkurog ang iyang kamot samtang nagsulat sa iyang suicide note. Sa maong sulat, iyang gisaysay ang matuod nga hinungdan sa iyang paghikog -- sa paghikog nila ni Evan. Iyang gipadayag ang dako niyang pagmahal sa iyang mga ginikanan hinungdan nga magpakamatay siya uban kang Evan nga maoy iyang kasawo sa pagpakasala. Sa kataposang bahin sa sulat, nangayo siya’g pasaylo sa iyang mga ginikanan sa iyang paghukom nga paghunos sa kaugalingon niyang kinabuhi.

Gipilo ni Destiny ang papel human sa iyang pagsulat. Iya kining giistipleran. Unya iya kining gipasok sa ilawom sa iyang unlan. Wala kini niya itago og maayo aron dali ra kining masusihan. -- Sumpayan pa