Ang Impiyerno ni Belen - 2

Gula 103

Nagpadayon ang relasyon namo ni Galen nga wala’y kasayoran si Roger. Hangtod nga nakakat-on ko sa lainlaing matang sa sugal. Gisugdan ko na pagwaldas ang allotment nga gipadala ni Roger nako. Matag semana gahinan gyud nako’g panahon ang pag-adto sa mga casino ug poker houses. Usahay mokuyog nako si Galen.

Sa casino nako nahimamat si Davis, process server sa usa ka korte sa Sugbu. Nakigsuod siya nako. Hangtod nga iya kong gipangulitawhan. Tungod ba kaha sa kahumok nako’g ilong, gisugot nako si Davis, sa wala’y paghunahuna nga tungod sa akong gibuhat posibleng makomplikado ang akong kinabuhi sa kapulihay.

Ang importante alang nako mao nga na-enjoy ko sa akong gibuhat.

Wala gililong ni Davis kanako nga duna siya’y asawa ug mga anak. Apan wala kining maong kamatuoran makapugong nako sa pagpakigrelasyon kaniya. Mora mi’g mga magnet nga mi-attract sa usa’g-usa.

Wala ko makabalibad ni Davis dihang usa ka higayon niana gidala ko niya sa usa ka mabugnaw’ng lawak. Didto gikatugyan ko kaniya ang akong kaugalingon. Naangkon niya sa hingpit ang akong pagka-babaye. -- Sumpayan pa