“Manglakaw na lang ta, Kuya,” sugyot ni Destiny usa ka higayon niana nga nagkasulti sila sulod sa iyang kuwarto. “Manglayas kita ug moadto sa dapit nga wala'y nakaila nato.”
“Ang buot mo bang ipasabot nga magtaban ta?” Sukit ni Evan.
“M-maingon-ingon niana,” maoy tubag.
“Dili kana sulbad sa atong suliran, Destiny. Angay lang kanang buhaton sa mga managhigugmaay. Pero sa atong bahin, walay lig-ong hinungdan aron magtaban ta. Mas eskandaloso hinuon kun masayran nga gitaban ka sa kaugalingon nimong igsuon.”
“Unya,” ni Destiny pa. “Unsa may angay natong buhaton karon? Nag-anam na ra ba'g dako kining akong tiyan.”
“Ikaw?” Gisumbalik si Destiny ni Evan. “Nursing student ka man? Wa ka bay nasayrang mga sekretong paagi kun unsaon pagkuha ang gisabak?”
“Duna ko'y nadunggan kaniadto nga paagi, pero dili ko segurado kun mosalir ba kini.” “Ato lang kahang suwayan?”
“Di lagi ko segurado. Mahadlok ko.”
Nanghupaw si Evan. Natugkad ni Destiny nga gibug-atan gayod ang iyang maguwang sa suliran nga ilang giatubang.
“Mas maayo pa tingali nga maghikog ta,” ni Evan. -- Sumpayan pa