May adlaw pang mosubang

Hesus! Ang tigulang, hibanggaan, wa man lang hunongi sa nakabangga," nakatuaw si Emily nga mipreno dayon sa iyang kotse. Gidala niya ang tigulang sa doktor nga iyang kaila.

"Kinsa man ni siya, Emily?"

"Wa ko kanila niya, Dok, kay nagsunod lang ko sa nakabangga niya, apan wala hunongi. Naluoy ko, akong gidala dinhi kay ang imong klinika man ang pinakaduol. I-charge lang nako ang tanang gasto niini, Dok, ug kun unsay kinahanglan, tawga lang ko sa akong numero. Unsa bay kahimtang niya, Dok?"

"Bali ang usa niya ka tiil ug dako'g samad ang iyang ulo nga nabunal tingali sa semento."

Nianang pagkabuntag, nahigmata si Regalado. "Huh! Nganong nia man ko sa ospital?" matud niya sa kaugalingon. "Nars, unsa may nahitabo nako?"

"Hibanggaan ka gabii, Noy, ug wa kay panimuot nga gidala dinhi. Unsa man diay imong ngalan kay akong ibutang sa libro?" Apan kalit nga napawong ang iyang panan-aw ug sa iyang pagmata, udto na. Nahinumdom na siya sa nahitabo kaniya. Tuig 1990 sa dihang nalunod ang bapor nga iyang gisakyan. Sukad niadto, wala na siya mahinumdom kun unsay nahitabo kaniya.

"Ma'am," gitawag niya ang usa ka nars, "unsang tuiga na karon?"

"Two thousand ten, wa diay ka mahibalo?"

"Nakalimot ko ma'am, salamat," ug mipiyong siya. 'Sa ato pa," matud niya sa hunahuna, 'bayente ka tuig kong nawala. Unsa na kaha ang gidangatan sa akong pamilya?'

"Maayo kay nagmata ka na, Noy," matud ni Emily nga bag-ong nahiabot. "Unsa may imong ngalan?"

"Regalado Algarme. Kinsa ka man diay, ma'am?"

"Ako’y nagdala nimo dinhi -- unsa to Noy, Regalado Algarme?"

"Oo, Regalado Algarme, ngano man diay?"

"Ig-unsa man nimo si Regalado Algarme Jr., anak ni Eva?"

"Akong anak ug si Eva, akong asawa. Hain man diay sila?"

"Naa gihapon sa inyong balay. Ikaw diay ang amahan ni Junjun nga dugay nang nawala."

"Kinsa ka man diay, ma'am?"

"Ako si Emily, kaslonon kami si Junjun karong Domingo. Ako siyang paanhion karon dayon," dayong kuha sa selpon ug mitawag. "Jun, ari dayon mo sa Martinez Clinic kay nia si papa mo."

"Ha! Naa si papa! Ma," gitawag ang iyang inahan, ''adto dayon ta sa Martinez Clinic kay tua kono si papa."

"Eva, akong asawa! Junjun, akong anak," migakos si Regalado sa duha ka binuhat nga wala niya makita sulod sa bayente anyos niyang pagka-amnesya. "Salamat nga misubang pa gihapon ang adlaw." (Kataposan)