Nalangan nga kabuntagon

Gula 72

“Ipakuha ninyo ang bata?” Sukna sa doktora nga estrikta kaayo’g tuno sa sinultihan.

“U-unta, Doktora,” si Evan maoy mitubag.

“Sa unsa mang hinungdan? Managtrato man kaha mo? Nganong dili na man lang hinuon kamo magpakasal?”

Nagkatinutokay sila si Evan ug Destiny. Nagtuo si Destiny nga ang diha sa iyang hunahuna mao usab ang gihunahuna sa iyang maguwang. Tug-anan ba nila ang doktora nga managsuon sila? Motuo kaha si Dra. Galas kanila kun ila kining tug-anan sa matuod nga hitabo nga maoy hinungdan nga nagsabak si Destiny ug si Evan maoy amahan?

“Mao kini suliran sa kadaghanan sa mga batan-on karon,” nagkanayon si Dra. Galas. “Giuran-uran na lang ninyo ang sex. Alang ninyo, ordinaryo na lang kaayo ang premarital sex. Pero wala ninyo hunahunaa ang inyong responsibilidad sa higayon nga magbunga ang inyong gibuhat.”

Wala makatingog sila si Destiny ug Evan. Managsama silang nagduko sa atubangan ni Dra. Galas.

‘Abi ninyo,” ni Dra. Galas pa. “Dili kay kamo ray miduol nako aron magpatabang sa ingon niining problema. Pero akong gibalibaran. Dili ko makahimo sa gusto ninyong ipabuhat nako.”

“B-bisan pilay imong ipabayad, Doktora,” ni Evan pa, “basta matabangan mo lang kami.” -- Sumpayan pa