Gula 96
Naka-score mi’g katulo. Paggawas namo sa motel, gikuyawan ko kay niingon man si Galen nga iya kong ihatod ngadto sa akong gipuy-an sa dakbayan sa Talisay.
Wala ko mosugot nga mohatod si Galen nako ngadto sa gipuy-an namo ni Roger sa Talisay. Dili ko gustong makatultol siya didto. Tingalig mosamot ang akong problema kun matultolan ni Galen ang pinuy-anan namo ni Roger.
“Dili mahimong moadto ka didto,” giingnan ko siya.
“Ug nganong dili man, Belen?” Sukit ni Galen. “Igo ra man kong mohatod nimo. Di ko magpakita sa imong ka-live in.”
“Basta kay dili mahimo. Please, Galen, ayaw na lang pamugos. Makigkita man bitaw ko nimo basta makalugar lang ko.”
Maayo gani kay wala na mamugos si Galen.
Pagkasunod adlaw nahiuli na si Roger gikan sa Manila. Wala na lang siya magpasugat nako sa airport. Nanawag lang siya nako sa cellphone aron pagpahibalo nga moabot siya. Giingnan ko niya nga mangandam kay adto mi manihapon sa gawas.
Pag-abot ni Roger sa balay, nakailis na ko. Naghangpanay mi sa makadiyot. Pagkataudtaod, giingnan ko niya nga manglakaw na kami aron adto mangaon sa usa ka mahalon nga restaurant. -- Sumpayan pa