Pangutan-a ang kasingkasing

Nahigugma si Annabelle kang Lauro taliwala sa kamatuoran nga si Lauro usa lang ka taksi driver. Si Anabelle usa ka magtutudlo sa tunghaang pribado sa dakbayan sa Cagayan de Oro.

Dul-an na sa lima ka tuig nga nagtudlo si Anabelle sa kolihiyo sa Cagayan de Oro College. Naay mga panahon nga kun tua sa Manila ang Dean of College, si Anabelle ang mapuli sa dapit niini. Nga sa ato pa, gisaligan siya sa dako sa eskuwelahan.

Taliwala ning tanan, daghan ang natingala nganong si Lauro man ang nahimong hinigugma ni Anabelle nga usa lang ka taksi driver? Nganong dili man kaha kadtong mga tawo nga naa unta sa taas nga hut-ong sa katilingban? Bisan gani ang igsuon ni Anabelle ang natingala kun nganong si Lauro man gayod ang gihigugma sa dalaga.

"Ayaw ninyo’g tamaya si Lauro kay wala pa kita masayod kun unsa man gayod ang iyang mabuhat dinhi sa atong pamilya," pulong ni Anabelle dihang nangutana ang iyang igsuon bahin kang Lauro. "Kinsa ang nasayod nga bisan kun usa lang siya ka driver, naay iyang mabuhat nga labaw pa sa usa ka engineer?"

"Hinuon, imo kanang katungod, Anabelle," pulong sa igsuon ni Anabelle nga usa usab ka magtutudlo. "Hinuon, husto ang imong gisulti nga naay mabuhat ni Lauro nga dili mabuhat sa usa ka engineer. Pero, ang kasagaran nga panghitabo sa kinabuhi sa tawo, mao kanang panultihon nga nagkanayon nga. 'Ang langgam nga pareho og balhibo magkuyog gayod paglupad.' Hinaot nga nasabtan ninyo ako."

Daghan sa mga higala ni Anabelle ang natingala gayod kaniya. Apan kun pangutan-on ang iyang kasingkasing, nahigugma siya kang Lauro tungod sa pagtuo nga usa kini ka buotan. Usa ka butang nga gidayeg ni Anabelle ang pagkatawo ni Lauro, mao kadtong panahon nga giuli ni Lauro ang usa ka kahon nga napuno og kuwarta nga nabiyaan sa iyang pasahero. Wala pa sila magka hinigugmaay kaniadto. Gidayeg na sa dalaga ang ulitawo kay tiaw mo kanang kapin sa usa ka milyon ang sulod sa kahon ug giuli kini ni Lauro. Mao kini ang hinungdan nga nagkasuod silang duha. Kun panahon nga mogamit si Anabelle og taksi, si Lauro gayod ang iyang sangpiton hangtod nga sa ilang pag-ilhanay, nagkasuod ang duha nila ka kasingkasing.

"Dili ka kaha kataw-an sa imong mga higala nga namunit ka lang og usa ka driver sa taksi?" pulong ni Lauro dihang nagkuyog sila sa pagsimba. "Hinuon, paningkamotan ko nga mahimong usa ka buotan mong hinigugma segun sa imong pagka-ila kanako."

"Pero pasagdi kadtong atong mga higala nga wala mahiangay kanimo," pulong usab ni Anabelle. "Ang gipangita ko sa usa ka tawo mao ang iyang pagkatawo. Hinaot, nga dili ako mahigawad sa pagtuo nga ikaw usa ka matarong nga tawo."

Nagminyo ang duha sa usa ka yanong kasal. Ang ilang kasal gihimo lang sa usa ka huwes sa ilang lungsod. Ang mga ginikanan sa ulitawo naningkamot kutob sa ilang mahimo aron mahimong masadya ang kasal.

Maayo na lang kay dunay kuwarta si Anabelle busa, nakatimbang kini sa uban nilang panginahanglan sa adlaw sa ilang pagkasal. Ang mga ginikanan ni Anabelle, walay nahimo sa hukom ni Anabelle nga makigminyo sa usa lang ka tigmaneho og taksi. Hinuon, mitambong kini gawas sa iyang igsuon nga magtutudlo nga wala gayod nga makigminyo siya sa usa ka drayber.

Nanglabay ang mga adlaw. Karon ang magtiayon, kaha giduyogan sa suwerte, tungod sa pag-abag ni Anabelle, si Lauro nakapalit na og kaugalingong taksi. Si Anabelle, giumentohan sa iyang ranggo sa tunghaang gialagaran. Sa mubo nga pagkasulti, hapsay ang panginabuhi sa magtiayon kaha gibuligan sa maayong kapalaran.

Kadtong mga higala nga nagpakamenos sa kang Lauro, wala na sila’y laing nasulti gawas sa pagdayeg sa magtiayon. Naay mga higala ang nakaingon pangutan-on usa nila ang kaugalingon kun dinhi sa kalibotan duna bay gipihig ang kapalaran?

Sila igo lang mitubag nga depende kana sa kapalaran nga maangkon sa tawo. Sama kang Anabelle nga naminyo lang sa usa ka taksi drayber apan ang ilang panagtiayon wala sungoga sa kasamok ug nagpabilin silang nagsinabtanay taliwala nga daghan ang wala magtuo nga sila magkadayon. (Kataposan)