“Akong giprangkahan si Devin, Kuya.”
“Giprangkahan nga unsa?”
“Nga wa ko mahigugma niya. Maayong masayod siya sa tinuod aron dili siya magsalig.”
“Luoyang Devin, no?”
“Nganong naluoy ka man kuno kaniya, aber?”
“Siyempre, lalaki gud ko. Kun ako pa sa iyang dapit, seguradong sakitan ko kun prangkahan ko sa babaye nga akong gipangulitawhan nga wa siya mahigugma nako.”
Nahilom si Destiny.
“Unya,” ni Evan pa. “Unsa may reaksiyon ni Devin sa imong gisulti.” “Nasubo,” maoy tubag. “Pero nakasabot siya sa akong side. Ug sa akong pagtuo, gidawat na niya ang iyang kapakyasan sa gugma diri nako.”
“Maayo hinuon kun mao kana aron di na siya magsamok nimo. Kay sa akong pagtuo ra ba, bisan pa tingalig magkahigugmaay pa kamong duha, mora’g wa gihapoy katumanan ang inyong gugma.”
“Nganong nakasulti ka man og ingon niana, Kuya?”
“Tungod sa imong kahimtang. Makadawat pa kaha si Devin kanimo sa higayon nga iyang masayran nga mabdos ka ug ako ang amahan sa bata nga imong gisabak?”
Nahitalunong si Destiny. Nakaamgo siya nga dako gyud diay ang mahimong epekto sa iyang pagmabdos sa iyang kinabuhi. Maguba gayod ang iyang kinabuhi ug kaugmaon tungod niining nahitabo kaniya. -- Sumpayan pa