Ang Impiyerno ni Belen - 2

 Gula 91

“U-unsay buot mong ipasabot?” Gisukit ko siya.

“Sundan ko ikaw sa imong pagpauli aron matultolan ko ang dapit nga imong gipuy-an.”

Problema gyung dako! Nakatuaw ko sa hilom. Ug kay naapiki na man ko, napugos ko pagtug-an nga sa Talisay ko nagpuyo uban kang Roger.

“Please Galen,” nangaliyupo ko kaniya. “Ayaw samoka ang pagpuyo namo ni Roger. Pasagdi na lang ko uban niya.”

“Ayaw kabalaka, Belen,” ni Galen pa. “Di ko magsamok ninyo basta gahinan mo usab ako’g panahon.”

Aron paglikay sa tino nga bulilyaso, misugot na lang ko sa gustong mahitabo ni Galen. Gidawat ko ang iyang kondisyon.

“Magteksanay lang unya ta kun gusto kong makigkita nimo,” ni Galen pa human niya makuha ang bag-o nakong cellphone number.

“Ikaw ang mag-igo,” nako pa.

Wala madugay, nananghid na ko kang Galen nga mopauli na ko sa Talisay. Apan wala siya mosugot. Gusto niyang mosulod mi sa usa ka mabugnaw nga lawak sa dili pa ko mopauli ngadto sa Talisay.

Wala ko makabalibad sa gustong mahitabo ni Galen. Mitsek-in dayon mi sa usa ka motel nga nahimutang sa downtown area. -- Sumpayan pa