Ang mosuleo ni Chao Lam Uy

Marian, kung wala na ako, anhi na kamo puyo sa mosuleo kauban ang atong mga anak nga sila si Peso ug Yuan," matud ni Chao kang Marian.

 Maid lang ni Chao si Marian, apan tungod sa kaguwapa niini, naanakan sa Insik og duha ka lalaki. Sukad niadto, pila lang ka bulan ang milabay, namatay si Chao. Usa siya ka bilyonaro ug pilantropo, sa usa sa mga food chain sa dakbayan.

Dugay nang giandam ni Chao ang iyang mosuleo, ug gihimo na niya kining pinuy-anan. Yano lang kining tan-awon, apan sa sulod niini, moderno ug high tech pa. Kompleto sa kahimanan, dolby stereo sounds ug magic speakers nga molanog ang tingog nga di mahibaloan diin kini gikan.

May dako kining screen ug 24 oras nga video surveilance cameras ug multi alarm sensors, sa gawas ug sulod sa mosuleo.

Usa ka adlaw, milakaw si Marian kay gisugo ni Titokito, ang igsuon ni Chao. Gabii na sa paghibalik ni Marian sa mosuleo, apan may nag-atang kaniyang tolo ka lalaki sa gate sa mosuleo. Kalit siyang gisignit, gilugos, ug human niini, gipatay. Gilabay ang patay'ng lawas sa layong dapit.

"Noy Peso, gabii na kaayo, wa pa man mouli si mama."

"Sagdi lang Yuan, mouli ra lagi to's mama, mouna na lang ta og kaon kay gutom na kaayo ko."

Human sa pangaon, nakatulog ang duha ka bata sa pagpinaabot sa ilang inahan. Ug unya ... "Noy, bangon bi, mora'g naay tawo sa hawanan."

"Tana, atong adton kay basin miabot na si mama."

Hayag kaayo ang katibuk-an sa hawanan ug naka-flash ang dako nga screen.

"Noy, tugtog man ron nga paboritong awit ni mama, ang 'Love will keep us alive'."

"Oy, tan-awa Dong, misalida, si mama kana, o, gitabangan sa mga bagis, gilugos nila si mama," nagpaminti sa kalagot si Yuan.

Ila dayon gitawagan sa selpon si Titokito nila nga wa madugay, miabot ug dayon nanglakaw sila aron i-report sa presento sa polis ang nahitabo sa ilang inahan.

Pagka-uma, sikop ang tanan suspetsado.

"Unsa god ni tsip, wa man mi labot ini."

Ang ilang abogado, mireklamo kay ilegal ang gihimo sa kapolisan kay kono way bug-at nga ibedensiya.

Sa kataposang hearing sa korte, nahukman gyud og tag-duha ka life sentence ang tolo ka tawo.

Unya, migahub ang bagolbol sa court room.

"Silencio! Silencio! Tan-awa ni ninyo!"

Ug gipasalida dayon ang tape nga nakuha didto sa mosuleo. Nahilom ang tanan. Human giposasan dayon ang mga konbiktado. (Kataposan)