Nalangan nga kabuntagon

Gula 65

“La’a gyud nang imong banakon,” ni Destiny.

Ug naghagwaay sila. Gilukop ni Destiny og kusnit ang lainlaing bahin sa lawas ni Evan. Nagkapuliki si Evan sa pagpanapang ug paglikay.

Pagkagabii, human sa panihapon, misulod dayon si Destiny sa iyang lawak. Mihigda siya. Apan wala madugay, may nanuktok sa pultahan sa iyang lawak. Mibangon siya ug giablihan ang pultahan.

Si Nang Nema ang didto sa gawas, nagpahibalo kaniya nga may bisita siya. Si Devin!

“Ingna siya, Nang, nga natulog na ko,” ni Destiny.

“Ako na siyang giingnan, Day, nga nagmata ka pa,” sa lagas pa usab.

Wala motingog si Destiny.

“Atubanga lang siya, Day,” matud ni Nang Nema. “Importante ra ba kuno kaayo ang iyang tuyo.”

Daklit nga naghunahuna si Destiny. Unya misantop sa iyang hunahuna nga dili niya angay likaylikayan si Devin. Nakahukom siyang atubangon ang lalaki aron matibway ang tanan tali kanila.

Giatubang ni Destiny si Devin sa sala. Gituyo niya pagmugtok ang iyang panagway aron magtuo si Devin nga wala gayod siya malipay sa pagpamisita niini kaniya. Misantop sa iyang hunahuna nga kinahanglang manghuwam siya og ngil-ad nga batasan aron lung-an na siya ni Devin. -- Sumpayan pa