Ang Impiyerno ni Belen - 2

Gula 89

Samtang nagkaon si Galen, nagkalingaw sab ko’g suyop sa akong iced tea pinaagi sa straw. Wala hutda ni Galen ang gi-order niyang pagkaon. Mihungit lang siya’g pipila ka kutsara ug miundang na siya.

“Unsay atong panagsultihan?” Nangutana ko ni Galen.

“Ang bahin nato,” laktod niyang tubag.

“Ngano man diay ang bahin nato?”

“Di ko mosugot nga bugtoon mo sa dakong kasayon ang atong relasyon, Belen. Kini ang hinungdan nga mianhi ko sa Cebu aron pangitaon ka.”

“May lain nang lalaki sa akong kinabuhi, Galen. Gisultihan ko na ikaw niana, di ba? Nag-live in na mi. Busa...”

“Wa ko’y labot sa inyong relasyon. Ang importante alang nako mao ang atong relasyon.”

“U-unsa ba gyu’y gusto mong mahitabo?”

“Di ko manghilabot ni magsamok sa imong pagpuyo uban sa imong ka-live in karon basta magpadayon sab ang atong relasyon.”

“U-unsa?”

“Gamay rang panahon ang akong pangayoon nimo, Belen.”

“Usa ka dakong binuang ang gusto mong mahitabo. Di ko makahimo niana, Galen.” -- Sumpayan pa