Nalangan nga kabuntagon

Gula 64

“Mangita lang gud ta’g laing paagi,” namulong si Destiny pagkilab sa pipila ka daklit. “Dili lang ta modangop sa aborsiyon.”

Nanggawas sila sa kan-anan nga wala makakab-ot og kasulbaran sa ilang suliran. Nagkasabot sila nga ililong ngadto ni bisan kinsa ang matuod nga kahimtang ni Destiny kutob sa panahon nga mahimo pa kining ikatago.

Namauli sila sa apartment. Sa ilang paghiabot, nagpakisusi dayon si Nang Nema bahin sa kahimtang ni Destiny. Ilang gibakakan ang lagas. Ila kining gipatuo nga nabugnawan lang ang tiyan ni Destiny hinungdan nga gipanuhot kini.

Wala modiretso si Destiny sa iyang lawak. Didto siya molahos sa lawak ni Evan. Ilang giserad-an ang pultahan aron dili madungog sa gawas ang ilang panagsulti.

“Kini gyu’y nakaangin niining problemaha,” ni Destiny pa nga mihana og kusnit sa atubangan ni Evan apan midali paglikay ang lalaki.

“Ayaw kana basola,” ni Evan pa. “Inosente na sa mga panghitabo.

Taliwala sa seryoso nilang problema, nakahimo pa gihapon sila sa pagkomedyahay sa usa’g-usa.

“Kala’a ba sab nimo’g laway, uy,” matud ni Destiny. “Natibuok man bisan kausa ra. Silabon sa ubang mga babaye, wa ka maka-buo.”

“Fertile sab tingali ka niadtong tungora sa pagkahitabo nato,” nagkanayon si Evan. “Maong mimabdos ka.” -- Sumpayan pa