Ang Santo Niño ug ako

Pag-abot nako sa Manila, mideretso ako sa Tondo sa balay sa akong higala. Igo ko lang gibilin ang akong mga gamit sa duha ka bag ug nangita dayon ako og kasak-an.

"Anhi ka na lang dinhi Pons," matud sa akong higala, "dugay na man ning way nagpuyo."

"Hain man diay ang tag-iya niini?"

"Namalhin na sa Bulacan usa ka tuig na nga miagi ug gibilin lang ning balaya namo."

"Nganong wa man ni paabangi?

"Daghan na man ang miabang niini Pons, apan dili man magdugay mamahawa dayon, wa pay usa ka bulan."

"Ngano man?'

"Naa may mogawas nga magtiayon nga multo man kono, wa man sab ko kakita. Kun tinuod na ug di ka mahadlok, anhi ka na lang dinhi, wa ka pay abangan."

"Sige, anhi na lang ko dinhi," matud ko. "Mosaka una ta kay tan-awon nako."

Sa didto na kami sa itaas, morag bugnaw kaayo sa sulod   bisan serado kini. Karaan nga balay kini apan lig-on pa kaayo ug ang salog niini, kahoy nga tugas.

Dili man matawag nga isog ako, apan di man sab ko talawan kun ang hisgotan mga ungo ug multo lang. Nianang gabhiona diha na ako matulog. Nianang mga ala una sa kaadlawon, mibangon ako aron mangihi. Pagtangka ko sa kusina, mao dayon ang akong nakita ang duha ka tigulang nag-atubang paglingkod sa kan-anan. Bisan nagbotok-botok ang akong dughan, miagi ako sa ilang duol padulong sa CR. Wala man usab sila magtagad nako hangtod nga mibalik ako sa akong lawak.

Usa ka semana na ang milabay, ug kada kaadlawon sa akong pagpangihi, naa gayud silang duha. Kay wala man sila manghilabot, gipasagdan ko sila.

"Bay, duha man ning inyong Santo Niño, ako una ning hulaman ang usa."

"Kuhaa lang Pons, kanang dako."

Nianang sayo sa hapon, gikan ko sa trabaho, nanihapon una ko sa silingan nga restawran. Pag-abot nako sa balay, ako dayon nga gibutang ang Santo Niño sa lamesa didto gyud sa tunga sa atubangan sa pagalingkoran sa magtiayon nga multo. Nianang kaadlawon sa akong pagpangihi, wala na ako’y nakitang multo.

"Nahadlok man tingali sa Santo Niño ang multo," matud ko sa kaugalingon.

Sukad niadto, wala na gyud mopakita ang multo ug wala ko na kuhaa ang Santo Niño sa lamesa. (Kataposan)