Miduol si Evan kaniya samtang nagsige pa siya’g suka. Gihapuhap niini ang iyang bukobuko.
“Pagpatan-aw og doktor,” sugyot ni Evan.
“Di na kinahanglan, Kuya,” niya pa. “Nabugnawan lang tingali ang akong tiyan. Nawaswas man gud ang akong habol kagabii.”
“Mas maayo gyung magpadoktor ka aron atong maseguro ang imong kahimtang,” insister sa maguwang.
Gikuyogan gayod si Destiny ni Evan ngadto sa usa ka klinika aron siya magpahiling sa usa ka mananambal. Usa ka babayeng doktor ang ilang giduol. Gihiling niini si Destiny.
Mipahiyom ang doktora human niini’g hiling kaniya.
“Wa man kay sakit, Day,” nagkanayon ang doktora nga kapyot na sa singkuwenta ang edad.
“U-unya, Doc,” ni Destiny pa. “Nganong lain man kaayo ang akong pamati sa akong kutokuto?”
“Tungod kana sa bag-ong kinabuhi nga miturok sa imong sabakan.”
“U-unsa?”
“Mabdos ka. Magtulo na ka bulan kanang bata nga imong gisabak.”
Gisignit si Destiny sa tumang kahikugang sa iyang nadungog. Nahapatan-aw siya ngadto kang Evan. Nagtan-aw diay usab si Evan kaniya.-- Sumpayan pa
Ang Impiyerno ni Belen – 2
Ni Uriel Cruz Vallecera
Ang tinuod, dili ko gustong moadto si Roger sa among dapit didto sa Bohol. Nabalaka ko nga magkakita sila ni Galen. Nagtuo kong wala pa makadawat si Galen sa akong gibuhat niya. Nahadlok kong si Roger ang iyang pahimungtan sa higayon nga magkita sila.
“Sa Mayo 4 man kuno ang piyesta sa inyong lungsod,” gikan ni Roger. “Mamakasyon ta didto sa Mayo.”
“Depende,” mao ray akong natubag.
“U-unsay depende?”
“Kun ganahan kong mobakasyon. Sa pagkakaron gud, wa pa koy planong mobakasyon sa Bohol. Mas gusto ko dinhi sa Cebu.”
Nakamatikod ko nga gitutokan ko ni Roger.
“Wa ka bay gitago nako, Belen?” Nangutana siya pagkataudtaod.
“Nga-nganong nakapangutana ka’g ingon niana?” Misumbalik ko’g pangutana niya.
“Ayaw lang laina pagsabot ang akong pangutana. Nahibulong lang ko. Nakamatikod ko nga mora’g wa kay gustong moadto ko sa inyong dapit.”
“Sa gikaingon ko na kanimo sukad pa kaniadto, wa ko’y gililong nimo, Roger. Ayaw lang laina pagsabot ang akong gisulti. Aw, kun gusto ka gyud nga moadto sa Bohol -- sa Mabini -- mahimo man nga moadto ka. Magpabilin lang ko dinhi.” -- Sumpayan pa