Nalangan nga kabuntagon

Gula 60

“Gitahod ko ang imong desisyon, Sir. Pero sa tinuod lang, nahinugon baya ko sa relasyon ninyo ni Devin. Boto baya unta ko niadtong lalakiha kun maoy imong mabana.”

“Nganong mahinugon ka man? Ikaw bitaw... nakigbuwag man sab ni Alexa kay matud mo, gusto kang makigrelasyon sa babaye nga tinuod nimong gihigugma. Mao usab ako. Gusto sab kong makigrelasyon sa lalaki nga maoy tinuod nakong gihigugma.”

“Aw, mao man kaha. Sige gud.”

Buntag sayo. Maoy namat-an ni Destiny nga naglain ang iyang kuto-kuto. Luod. Kasukaon siya. Mora’g nadaot ang iyang ginhawaan.

Dihang daw dili na niya maantos, midali siya paggawas sa iyang lawak. Midagan siya paingon sa banyo ug midigwa. Mora’g mahabwa ang iyang tinai sa pagsinuka. Apan pulos lang laway ang iyang gisuka.

“Naunsa ka, Sis?” Pangutana ni Evan nga misunod kaniya pagsulod sa banyo nga wala niya kaserad-i gumikan sa pagdinali-dali.

Nakasabot si Destiny nga nahingawa si Evan sa iyang kahimtang.

“L-lain kaayo ang akong ginhawaan, Kuya,” mubo niyang tubag.

Unya midigwa na usab siya. Pulos gihapon laway ang migawas gikan sa iyang baba. -- Sumpayan pa