Sinulog 2010 karong adlawa. Sayo nga mipara’g jeep si Goody nga magbiyahean paingon sa Basilica del Sto. Niño. May ipamarayeg siya sa Balaang Bata, kinsa nailhan na sa tibuok kalibotan sa Iyang pagka milagroso.
Puno na sa mga pasahero ang likorang bahin sa Armak nga gipara ni Goody. Atubangan na lang ang bakante ug didto na lang siya molingkod.
Unya diha pa lang sila sa dalan Echavez, nadungog ni Goody ang kusog kaayong mandar sa usa sa mga lulan.
"Hold-up kini! Ayaw kamo pakita’g pagsukol aron dili mabuak inyong ulo ning dala namong armas. Kuwarta, mga alahas ug selpon day among tuyo."
"Sige, itunol na ninyo ang among gipangayo. Dali!" Sumpay singgaak sa laing isugong lalaki nga mikak sa iyang .45 kalibre.
Ang tanan nakuyawan. Daw buotang mga karnero nga misunod sa mandar sa ilang agawon. Nalingaw ang laing kauban sa mga tulisan sa pagkolekta-sulod sa mga gipangtunol nga pitaka, alahas, selpon ug uban pa didto sa gibitbit nga nagngangang klatsbag. Si Goody nga nakakita sa gibuhat sa mga tulisan didto sa salamin sa sakyanan, morag mituskig sa iyang nahimutangan. Gikulbaan pag-ayo labi na nga mihana na kini’g paduol sa iyang likod.
Apan nahibulong si Goody dihang kalit lang napaatras ang tulisan. Ingon sa adunay gikahadlokan. Daw natarantar kini nga misiyagit ug mimando. "Hunongggg!!! Drayber, ihunong ang sakyanan!!!!"
Ug sa gibrekan na sa drayber ang dyip, naglumba’g kanaog ug panagan ang mga hinanib ni Satanas, kinsa dali rang nawala sa panan-aw sa mga pasahero.
Nahibulong si Kidlat, ang dakodako sa ilang pundok, sa gihimo sa iyang kauban. Pag-abot nila sa ilang hide-out, nangutana: "Nganong nalisang man ka, Bagsik, paghana nimo’g kolekta sa alahas didto sa may pronsit?"
"Dili man god alahas ang misugat sa akong kamot, Boss." Pahayag sa alalay.
"Kay unsa man diay ang misugat nimo?" Apas-sukna sa lider sa mga tulisan.
"Dako kaayong bitin, Boss nga dala niadtong naglingkod sa may pronsit. Nagpanilap kini ug mihanag tundok sa akong nawong, mo'tong puwerte nakong kurata." Dugang asoy sa batabata.
"Mao ba?" Nakunot ang agtang ni Bagsik nga daw nahatiurok sab. "Buanga no?"
Lakip na ang tanang pasahero sa diyep nga ning higayona nagsubay na sa dalan Magallanes, naglibog unsay gikahadlokan sa tulisan didto sa may pronsit? Nganong wa maapil sa pagtulis ang naglingkod nga si Goody. Busa, nag-iyahay sila’g lili unsa mang butanga ang naa didto nga maoy nakapalisang sa mga tulisan.
Ug nahasiga ang ilang mga mata dihang maoy misugat sa ilang panan-aw ang gamay'ng imahen ni Senyor Santo Niño nga gisabak ni Goody. (Kataposan)