Target

Ang target nga karnenorte maoy labing lamian kun itandi sa ubang mga karnenorte sa katindahanan. Bus-ok kaayo kini ug bug-at ang timbang. Imyos ang sudlanan niini aron paghatag og kasayon sa paghuwad. May yawe kini. Modaghan kini pag-ayo inig kabungkag sa bugwal sa kutsara.

Kini ang ampay ni Fredmon Monterola. Motingob siya’g palit niini matag suweldo sa kompaniya nga iyang gitrabahoan. Matag pamahaw, paniudto ug panihapon aduna gayo’y TARGET nga iyang ablihan. Sa panahon nga aduna siya’y bisita TARGET usab ang iyang ipasumsom.

Unya, mihugpa ang krisis sa tibuok kalibotan. Nanera ang kompaniya nga iyang gitrabahoan. Kay wala na man siya’y trabaho wala na usab siya’y TARGET. Maglaway siyang magtan-aw sa mga TARGET nga ipang-display sa katindahanan.

Usa niana ka higayon nagkaabot sila si Marman sa tindahan. Mipalit siya niadto’g sigarilyo.

"Gaw, uhaw man! Mosiyat tag usa ka lapad! Niay akong P25.00, pun-i ri, Gaw!" nagkanayon si Marman nga utro usab nga way trabaho.

"Sus, wa gyod 'tawon koy kuwarta, Gaw," tubag ni Fredmon nga minghoy ang panagway.

Mihinuktok si Marman. Unya, miduol kini sa tindera ug mihangyong mangutang. Misugot ang tindera. Labihang lipaya ni Marman. Sa pagkahurot na sa ilang giinom....

"Gaw, gutom man! Mangaon ta sa amo," agni ni Marman.

"Unsa may sud-an, Gaw?"

"TARGET!"

"Kana, da!" ni Fredmon pang mahinangpon. "Sus, kadugay na nga wa ko makatilaw og TARGET!"

Nanglakaw ang manag-agaw. Sa pag-abot na nila sa payag ni Marman nagsukad gilayon kini. Naghinam na pag-ayo si Fredmon sa TARGET nga giingon ni Marman.

Mitan-aw si Fredmon sa gisukad ni Marman. Tinughong sa kan-ong mais! Nagbutang kini’g asin sa platito ug gipahiluna tupad sa duha ka panaksang tinughong. Sa pagkatapos....

"Sige na, Gaw," ni Marman pang miuna pagpuk-ong atubangan sa pagkaon nga gibutang sa salog nga kawayan.

"Hain man ang TARGET, Gaw?" sukna ni Fredmon nga nagpanglad-ok sa laway.

"Kana, Gaw," ni Marman pa nga mitudlo sa asin sa platito. "Itarget ang imong tudlo nianang asin, Gaw, ug tamyi dayong higop sa tinughong. Haskang lamia, Gaw! Kanang sud-ana, Gaw, gitawag ko og TARGET!"

"Giti sa kagannnngggg!" ni Fredmon pang gigamhan sa kabawo.(Kataposan)