Ang Impiyerno ni Belen - 2

Gula 76

Miligdong ang nawong ni Roger. Mitutok siya nako.

“Nagduhaduha ka ba gyud diay sa katinuod sa akong gi-propose nimo?” Nakapangutana si Roger nga ingon sa nahisagmuyo.

“Mora’g dili man gud katuohan nga may lalaki pang moseryoso sa pagpakigrelasyon nako,” giingnan ko siya.

“Nganong nakasulti ka man og ingon niana, Belen?”

“Wa ko’y gitago nimo, Roger. Gitug-anan ko na ikaw sa kaagi sa akong kinabuhi busa nasayod ka na nga may malaksot kong kagahapon.”

“Ug unsa may naa niana?”

“Naay daghang mga babaye nga way kagahapon ug imong ikapasigarbo. Nganong ako man gyud ang imong tuyoan?”

“Tungod kay ikaw ang gipili sa akong kasingkasing, Belen.”

Wala ko makatingog.

“Andam kong mangatubang sa imong mga ginikanan bisan unsang orasa, Belen,” ni Roger pa. “Ug pangayoon ang ilang pagtugot nga magminyo ta.”

“Wa na kana kinahanglana, Roger,” nako pa.

“U-unsay buot mong ipasabot?”

“Di na kinahanglang mananghid ka sa akong mga ginikanan. Nakahukom kong di na mopauli sa among lungsod. Mokuyog na ko nimo inigbalik nimo ngadto sa Cebu.” -- Sumpayan pa