Ang buntog ug ako

Nagpungasi na ang kainit sa Adlaw sa akong panit busa gitan-aw ko ang baratohong relo de pulso nga gisulod ko sa bulsa sa gisul-ob kong dyakit. Hapit na ang alas onse sa udto! Gitangtang ko dayon sa yugo ang torong kabaw nga maoy kaabag ko karon sa pagdaro ug giguyod ko kini paingon sa ilawom sa dakong punoan sa kaymito. Nahimutang sa ilawom sa maong kahoy ang lapokon nga tunaan ug may kumpay usab didto nga akong giandam.

Dihang nahigot ko na sa punoan sa kaymito ang pisi sa kabaw milakang ko paingon sa payag-pahulayanan nga gituyo gyod paghimo sa akong mga ginikanan aron duna kami kapasilongan samtang magtikad sa among darohan.

Nahimutang kini haduol lamang sa dakong punoan sa kaymito. Paghiabot ko sa payag gihubo ko dayon ang gisul-ob kong maong nga dyakit nga umog na sa singot ug dihadiha misapigad dayon sa akong lawas ang bugnaw nga huyop sa hangin.

Milingkod ko sa taas nga lingkoranan ug gianinaw ang kinatibuk-an sa halapad namong umahan. Dako pa kaayo ang akong darohon. Ug kinahanglan nga mahuman ko na kini sa pagdaro aron unya sa pag-abot sa ulan mahimo na kining matamnan. Gipahiluna ko ang lapoy kong lawas sa sandiganan ug gipiyong ang akong mga mata unya nanumbalay na usab sa akong hunahuna ang dugay ko nang gipangandoy...

Gikapoy na ako sa pagtikad sa uma ug buot ko nang mobiya ning dapita. Nangandoy kong moadto sa siyudad kay sumala sa akong nasayran tua sa siyudad ang hayag nga ugma sa tawo. Napulog walo na ang akong panuigon apan natapos ko lang ang ikaduhang ang-ang sa hayiskol apan dili kini babag alang kanako. Ugma, mohilom ko sa paglakaw ug moadto sa siyudad!

"Twitt! Twiitt!" Naputol ang lawom kong paghinuktok dihang mitugpa sa kaymito ang panon sa itom nga mga langgam nga galansiyang. Naglumba sila sa pagpangambak sa mga sanga nga nanagdayak sa tumang kamalipayon. Sa ubos sa kaymito nakita ko usab ang nag-inusarang langgam nga buntog nga mihangad ug milantaw kanila. Mikiat sa pagpangambak ug pag-awit ang mga galansiyang dihang ilang namatikdan nga nagtan-aw kanila ang buntog.

Ang buntog nga nakamatngon sa pagpasuya sa mga galansiyang, kalit nga milupad ug binalon ang dakoay niining garbo mitugpa sa kinatas-ang sanga sa kaymito. Nahilom ang mga galansiyang nga milantaw sa buntog nga mapagarbohong mipatong sa kinatumyang sanga. Unya kalit nga nanghugyaw ang mga galansiyang dihang nahulog ang buntog kay nalimot diay nga kulang siya sa tudlo ug dili makagunit sa sanga nga iyang gitugpahan. Ug tungod sa kaulaw midagan ang buntog pagtugpa niini sa yuta ug mitago sa labong nga mga sagbot!

Tungod sa talan-awon nga akong nakita nakapanghupaw ko. Diha sa buntog nakita ko ang akong kaugalingon. Kulang ako sa edukasyon ug dili angay'ng kab-oton ang taas nga pangandoy kay kon buhaton ko kini hayan mahisama ako sa buntog!

Mibarog ko ug gikuha ang maong mga dyakit nga umog pa sa singot. Ug gisul-ob ko kini pagbalik. Unya gikuha ko ang kabaw gikan sa ilawom sa kaymito ug giguyod paingon sa nahimutangan sa puthaw nga daro. Tiwason ko na lang pagtikad ang lapad namong uma ug sagubangon ang kainit sa Adlaw. Sa akong hunahuna migitib ang bag-ong pangandoy nga mao ang pagpadayon unya sa akong pagtuon! (Kataposan)