Ang kaluha

Si Jessie ug Selandy kaluha. Managsama ang hapit tanang butang nga ilang nahuptan. Pareho silang tall, dark and handsome. Pareho usab sila nga hait ug mga salabotan. Ang ilang kalainan mao lamang ang mga mithi nga ilang gibarogan sa kinabuhi.

Kay samtang si Jessie mahigugmaon sa mga butang espirituhanon si Selandy mahigugmaon sa mga butang nga kalibotanon. Si Jessie nag-apas sa mga butang nga malungtaron ug walay kataposan. Samtang si Selandy nangandoy sa pag-angkon sa mga butang nga lumalabay lamang. Sama sa ambisyon nga mahimong labing adunahan ug gamhanan sa ilang dapit.

Ang kanunay nga gihunahuna ni Jessie mao ang mga ganti nga langitnon nga atong madawat gikan sa Diyos human ta matuman ang iyang mga kasugoan sa pagsangyaw sa maayong balita sa kaluwasan ngadto sa mga tawo nga wala pa madawat kang Kristo isip ilang Diyos ug personal nga manluluwas.

Samtang sa laing bahin, ang kanunay nga gihunahuna ni Selandy mao ang pagpanguwarta sa matag adlaw. Pinaagi sa daotan ug minaayo nga paagi.

Alang kang Jessie dili igo nga ang tawo makaila lang sa Diyos. Ang tawo kinahanglan usab nga masayod kon unsa ang makapasuko ug makapahimuot kaniya. Aron molig-on ang mga talikala nga nagdugtong sa relasyon tali sa Diyos ug tawo kinahanglan gayod nga ang ilang panaghigalaay kanunay nga bisbisan sa espirituhanong panagkukabildo, pag-ampo, pag-awit ug paghimaya sa Diyos.

Gikasilagan ni Jessie ang mga tawo nga magpaila nga mga Kristohanon, apan mosangpit lamang sa ngalan sa Diyos sa panahon sa emerhensya. Dili gayod sila makahinumdom sa Ginoo kun anaa sila sa pagkaabunda o kabuhong sa kinabuhi.

Pila may estorya, na milyonaryo gayod si Selandy. Apan, wala siya’y kalinaw sa iyang pagpuyo. Kay ang iyang asawa ug mga anak mosaka man lang ug manaog sa ilang panimalay. Unya moadto sa ilang mga barkada aron modula og mahjong, inom, paggamit sa gidiling drugas o kaha paglipaylipay uban sa mga kaliwat ni Eba.

Sa laing bahin, si Jessie nagpabilin nga kabos. Apan, anaa kaniya ang hingpit nga kalinaw ug kalipay nga si Kristo lang ang makahatag. (Kataposan)