Naputol ang trabaho ni Jerry sa gaming area dihang gipahibalo siya sa ilang opisina nga aduna siya'y tawag sa telepono nga matud pa importante kuno kaayo. Kinsa kaha ang nanawag? Tsiks kaha?
Nagbinuotan na man god si Jerry. Niadtong unang adlaw sa Misa de Gallo gikompisal niya ngadto sa pari ang tanan niyang mga sala. Tsikboy siya ug daghang babaye ang gipahilak. Usa na niini si Connie, ang iyang buotang asawa, kinsa bisan pa sa iyang kadukirok sa mga girls, mga luha ug rosaryohan ra gyod tawon pirme ang isugat sa iyang misis kada higayon nga dugay siyang mahiuli sa ilaha, diin usahay magkalipstik pag pula ang kuwelyo sa iyang polo.
Diyosnon si Connie. Sakit man ang mga pagbudhi nga gibuhat sa iyang bana kaniya, iya lang giantos ang tanan tungod ug alang sa kaugmaon sa ilang mga anak. Gisalig ang kaayohan sa samad sa iyang kasingkasing ngadto sa atong Makagagahom.
"Abi nimo, Jr, wa gyod ko makatulog, ay." Pahibalo sa asawa dihang alas 4:00 na sa kaadlawon siyang miabot sa ilang balay sa adlaw nga iyang day-off. "Nagsige na lag kog pangadye nga unta ilikay ka Niya sa mga daotan. Uso god ron sa pagpamatay sa mga karibal nga gangs. Nahadlok ko nga basig mapagan ka, simbako."
Ingon niini kapinangga si Jerry sa iyang kapikas, diin luyo sa kabuotan niini, maoy iyang gibawos ang pagpunay'g pamabaye. Kapila na ba siya makasala sa iyang asawa? Kapila na ba niya kawata ang kaugalingon niyang suweldo pinaagi sa pagtahan lang og gamay'ng bahin ngadtong Connie? Ang pamilya niya puwerteng daginot, samtang siya si Jerry labihang nakawaldas sa salapi didto sa naghitak nga balay-kahilayan ug karaoke bars sa dakbayan.
Hangtod nasakit siya ug dili na mahimong makainom sa ilimnong makahubog. Sakit nga bisan pa unsa kamahal sa tambal ang iyang gitomar, wa gyod siya maayo. Gipaila siya sa Ginoo unsa ka sagrado ang mga luha sa asawa. Gusto sa atong Magbubuhat nga mobalik na si Jerry pagpasilong sa Iyang landong. Ug tuod man, niadtong unang adlaw sa Misa de Gallo misaad si Jerry nga magbag-o na sa iyang kinabuhi ilabi na kay hapit na sab moabot ang Bag-ong Tuig.
"Hello, kinsa ni?" Naisa ang kilay ni Jerry nga midaitol sa telepono ngadto sa iyang dalunggan dihang diha na siya sa ilang opisina.
"Ako ni, Jer, si Lovely. Abi nimo bisag naminyo na kog Amerikano no, gimingaw lang gihapon ko sa imong dinad-an nako, ay." Tubag sa pikas linya nga tugob sa kaparaygon.
Dali rang nanumbalay sa alimpatakan ni Jerry ang kagahapon nilang Lovely. Guwapa kaayo kini. Kinalamiag lawas ug maoy kinabatan-onang dancer sa Flaming Zone. Nauyab niya kini ug namalmal pag-ayo ibabaw sa kama. Tam-is nga walay sama ang kainit sa sex ni Lovely. Makabuang! Nagkabulag lang sila dihang giminyoan si Lovely sa usa ka adunahang amerikano. "Nia ko ron sa Pilipinas, Jer, nga mao rang usa. Anhi ko magbag-ong tuig sa atoa. Gusto ko nga madulog tika karong Bag-ong Tuig sa gabii. Didto sa naandang lugar nga kanhi maoy gihimo natong abotanan pirme. Please don't fail me. Miss na miss na kaayo ko nimo." Dugang pangindahay ni Lovely.
Wala dayon makatingog si Jerry. Ning iyang pagbalik sa mga kamot sa Ginoo, mitumaw sab kining usa ka malamatong tentasyon nga iyaha sa Yawa. Asa? Asa ang iyang pilion niini?
Jer, sige na ba? Pleaseee!!" Matud pa sa nagpakiluoy'ng tingog nga mapugsanon.
"Okay, okay, see you there!" Mga pulong nga daw naharos lang pagpanglibkas sa baba ni Jerry dayong butang sa telepono.
Bag-ong Tuig sa gabii. Wala tungaha ni Jerry si Lovely, kinsa natagbaw niyag paabot didto sa ila kanhing abotanan. Lain ang gikauban ni Jerry sa usa ka luhong Five Star Hotel -- si Connie ug ilang mga anak nga pulos malipayong nanihapon.
"Unta hisabtan ni Lovely kining nakab-ot kong kataposang hukom ning adlaw sa Bag-ong Tuig." Hagawhaw sa hunahuna ni Jerry samtang mihungit sa usa ka kutsarang cake ngadto sa gipangga na pag-ayo niyang asawa. (Kataposan)