Nalangan nga kabuntagon

“Ambot lang, Kuya. Kun simbako maminyo gyud ko ngadto kang Greger, pagabasolan ko gyud kini sa tibuok kong kinabuhi.”“

Mora’g gisungog gyud si Destiny sa kahigayonan. Kay nianang pagkagabii, nahiabot si Allison kuyog sa mga ginikanan niini sa ilang pinuy-anan.

Labihan niyang lagota. Wala siya mogawas sa iyang kuwarto. Dili siya gustong makakita sa panagway ni Allison.

“Pagawason ka nila ni Daddy ug Mommy,” nagkanayon si Evan nga misungko kaniya sa iyang lawak. “Magdungan kuno kita sa pagpanihapon.”

“Di ko, gipusdak ni Destiny ang maong mga pulong. “Kamo ra didto.” “Sige na lang gud,” hangyo ni Evan. “Respetaran lang nato sila. Di man bitaw kini kanunay.”

“Di lagi ko. Di ko ganahan makig-atubang nianang Allison.”

“Unya, unsa may akong ipangatarongan nilang Daddy ug Mommy?” “Ingna lang sila nga lain ang akong pamati sa akong lawas. Pamakak lang gud. Patuoha sila nga gitunghaan ko sa akong binuwan nga bisita.”

Wala gayod makapugos si Evan kang Destiny. Migawas na lang kini sa iyang lawak ug mibalik ngadto sa nahimutangan sa ilang mga bisita. -- Sumpayan pa