Nalangan nga kabuntagon

Gula 46

 “Di na kana ikahibulong. Basta ikaw, wa man gyud kay magustohang babaye para nako.”

“Kay nakagusto ka diay kang Allison.”

“Aw, wa lagi sab hinuon. Di gyud ko mangasawa nianang babayhana. Ang gusto ko, akoy mamili sa babaye nga maoy akong ihatod sa altar sa kaminyoon. Di ko gusto nianang buya-buya. Kinaraan na kana.”

“Ang gusto ko, motabang ko’g panghimbis sa babaye nga imong pangasaw-on.”

“Na,” nagtingsi si Evan. “Mao ray gidangat.”

Nahilom sila’g makadiyot.

“Makigkita ka ba kang Allison, Kuya?” Sukna ni Destiny pagkilab sa pipila ka gutlo.

“Wa pa ko makahukom, Destiny,” maoy tubag. “Pero kun magkinaunsa, respetahan na lang nako si Daddy. Aron di siya masuko nako.”

“Pangita na lang og alibi,” ni Destiny. “Di ko gustong makigkita ka kang Allison.”

“Sagdi lang gud,” ni Evan pa. “Respetar ra bitaw ning ako. Pareho gud sa imong gihimo dihang namisita si Greger nimo.”

“Di man gyud unta ko makig-atubang kang Greger kun di pa tungod nimo,” ni Destiny. “Mituman lang ko sa imong gisulti.”

“Unsa man gyud kahay atong buhaton, no, aron makalikay kita sa pagbuya kanato sa atong mga ginikanan ngadto sa mga anak sa ilang mga higala ug kasosyo sa negosyo nga ilang nagustohan?” -- Sumpayan pa