Paspas ang pagkalot ni Noy Henry og lungag sa yuta sa tungatungang bahin sa iyang kalbasaan. Pinaagi sa dala niyang pala ug bara, kadali ra kaayo nga naporma ang gihimo niyang gahong. May giladmon ang gihimo niyang gahong.
Gihaklapan dayon niya ang ilawom nga wanang sa gahong og mga tunok sa kaningag ug sampinit. Sa ibabaw, gihaklapan niya og dahon sa kahoy ug kalbasa ang baba sa gahong aron dili mailhan.
Nanambo ang pahiyom ni Noy Henry. Pinaagi ning maong gahong, mailhan ug masakpan na gayud niya ang kawatan nga maoy tigkawat sa mga gulang na nga bunga sa iyang kalbasa.
Kaduha na kini ka higayon nga gikawat ang mga dagkong mga bunga sa iyang mga kalbasa. Sa miaging Sabado, lima ka dagkong kalbasa ang nadiskubrehan ni Noy Henry nga nahanaw sa kadaplinan sa iyang kalbasaan.
Ug ning buntaga na usab, laing lima ka dagkong bunga sa mga kalbasa, ang nahanaw sa tungatungang bahin sa iyang halapad nga kalbasaan. Nahigalam ang kawatan. Namungingi man god sa mga bunga ang halapad nga kalbasaan ni Noy Henry sa iyang umahan.
"Animal nga kawatan! Mailhan ka na gayud inigkatagak nimo ning akong gahong!" nagpaminti si Noy Henry dihang nahuman ra gayud niya ang giandam nga gahong.
May gidudahan siya nga kawatan. Maoy pagtuo niya nga si Rey-Linda maoy tigkawat sa iyang mga kalbasa. Way klarong trabaho si Rey sa ilang baryo nga hilig kaayo sa tigbakay ug madyong.
Bugtong gisaligan niining trabaho mao ang pagkamasyador sa bulangan. Halinon man god kaayo ang mga bunga sa kalbasa ni Noy Henry ug daghan ang moangkat niini sa ilang baryo.
Sa ilang baryo sa Basak, si Noy Henry mao ang nanag-iya sa tambok nga kalbasaan nga umahan. Nakapaharuhay kini sa ilang pagpuyo ni Nang Carmen, tungod kay nakabaton sila og suking maoy motingob sa pagpalit sa mga bunga sa kalbasa matag semana, ug itumod ngadto sa siyudad.
Nakatigom silang magtiayon og igong kantidad nga kuwarta ug maoy plano ni Noy Henry nga gastohan ang bugtong anak sa pagpa-eskuyla sa bisan unsang kurso sa kolehiyo, inigkagradwar na ni Mar sa hayskol.
"Pagtinarong og eskuyla, Mar! Paninguhaa nga makagradwar kas hayskol! Kami si Mama nimo ang bahala sa paggasto nimo sa kolehiyo! Likaye ang paghugoyhugoy sa barkada...!" mao kini ang kanunay ipahimangno ni Noy Henry kang Mar, ilabi na kay nakadawat silag balita si Nang Carmen nga nahilig sa pagpakigbarkada ang bugtong anak.
Sayo nga nahigmata si Noy Henry pagkasunod buntag. Wa niya tagda si Nang Carmen nga nagkiroskiros sa paghikay sa kusina sa pamahaw ug nagpahibalo nga wala mahiuli si Mar nga mitambong og disko sa kasikbit nga baryo kagabii.
Naghinam si Noy Henry nga mitibaw sa iyang gahong. Kon mibalik ang kawatan kagabii, seguradong natagak na kini sa giandam niyang gahong ug natusok na ang lawas niini sa mga hait nga tunok sa kaningag ug sampinit.
Wa mosipyat ang pangagpas ni Noy Henry. Nabati niya ang inagulo sa sulod sa gahong. Pagtambo niya sa baba sa gahong, maoy nasugat sa iyang panan-aw ang kawatan nga nagping-it didto sa ilawom sa gahong. Natunok ang lawas niini sa kaningag ug sampinit! Sakpan ang kawatan! Apan nahiugnok si Noy Henry nga mitutok sa panagway sa kawatan nga nagpanawag kaniya.
"P-Pa H-Henry! T-tabangi ko...!"
"M-Mar! I-ikaw....! (Kataposan)