Bag-ong tuig, bag-ong gipatakdan

Dihang nagkita sila si Andrew ug Cesar sa usa ka restawran nakahukom na lang sila nga mag-inom. Sama sa naandan, kon mahitabo nga magkahimamatay sila, mag-inom gyod sila ug ang ilang imnon mao gyod ang beer. Klasmet sila sa usa ka subject sa kursong BSBA ug si Andrew ang matawag nga maoy lantip og salabotan.

Anak siya og usa ka tubigtubigan didto sa ilang lungsod sa Magsilang. Ug karon nga nagkakitaay sila nga wala lang tuyoa, may gisulti si Andrew kang Cesar ug bahin sa usa ka negosyo nga gustong sugdan ni Andrew.

"Negosyo?" Nahaiknat ang kilay ni Cesar dihang gipahayag ni Andrew ang iyang laraw.

"Oo, mag-negosyo ko, Sar," hinay niining tubag.

"Aw, duna ka na man kahay puhunan," mitutok si Cesar sa iyang higala. "Unsang negosyoha?"

"Buy and Sell," miigham si Andrew.

"Unsang butanga?"

"Mga karaang butang, mga antigo. Sama sa karaang tibod, plato, tasa, platito, mga tadyaw nga hinimo sa mga insek sa karaang panahon. Bisag unsa basta kay karaan, mga antigo..." Giyarok ni Andrew ang baso nga puno sa beer.

"Kanus-a ka magsugod sa imong negosyo?" nangutana si Cesar.

"Sa unang semana sa 2010," kalma si Andrew nga mipahibawo.

"Bag-ong tuig, maayo maayo," giyarok usab ni Cesar ang iyang beer nga diha sa baso.

"Sayod kong duna kay daghang nahibaw-an bahin sa mga antigong butang, kay ang imong amahan nga si Bonifacio tigkawot niadto og mga karaang tibod. Seguro, makatabang ka nako," miigham na usab si Andrew.

"Way problema, na, sultihi lang ko kon magsugod na ka."

"Salamat, Bay Cesar. Karong tuig 2010 duol na man, adtoon tika sa inyo, Okey?" Mipahiyom si Andrew.

"Okey?" Ug gipadayon nila ang ilang pag-inom sa serbesa. BAG-ONG TUIG, 2010, gisugdan dayon ni Andrew ang iyang negosyo nga mao ang pagpamalit og mga antik nga butang. Gidala siya ni Cesar sa usa ka karaang balay nga modelo panahon sa katsila. Didto ang tag-iya nga tiguwang mestiso nga si Nyor Conde. Gipakita ni Nyor Conde si Andrew sa mga butang nga mga antigo ug dihang nagkasabot sila sa presyo, misaad si Andrew nga iya kining balikon ugma ug magdala siya’g trak de karga aron may kargahan sa mga antigo nga mga plato, tibod, banga, tadyaw ug uban pa.

"Dugay kong nangandoy nga unta duna nay negosyante nga mopalit niining mga karaan kong collections, ug nia kana, Andrew, miabot ka," talagsaon ang gilaw sa pahiyom ni Nyor Conde.

"Ugma, mobalik ko dinhi, kaming duha ni Cesar," matud ni Andrew.

"No, no, may lakton ko ugma, Andrew, di ko kauban nimo," matud ni Cesar.

Mingaw ang balay sa pagbalik ni Andrew ug diha si Nyor Conde sa may sala sa karaan nilang balay. "Dali, dali, Andrew, tilawi una kining lamian kong bino. Antigo usab kining maong bino, dugay na ni dinhi nako, hinatag kini sa akong kompare nga patay na..."

Ug miinom si Andrew sa bino. Humag inom sa bino nga gidalit ni Nyor Conde, hibatyagan niyang migaan ang iyang lawas ug unya nanginit ang iyang agtang. "Nahubog ko da," ni Andrew pa.

"Andrew, sama kang Cesar, usa na ka ka ungo. Gipainom ko ikaw og bino nga may patakod. Pero, ayaw kabalaka kay tabangan ko ikaw pagpangita og daghang mga antik nga butang. Sa balay sa mga higala kong mga ungo dunay daghang mga antik, hmmm..." Mipahiyom si Nyor Conde. "Bag-ong Tuig karon, Andrew, tayming pod nga ikaw mao ang labing bag-o kong gipatakdan, Happy new year!" (Kataposan)