Larawan sa demonyo

Sakop si Joseph sa teroristang grupo nga nagbase sa Mindanao. Maoy buhat sa ilang pundok ang pagpamomba sa mga edepisyo ug mga instalasyon sa nagkadaiyang mga dapit sa atong nasud. Dili nila igsapayan ang mga kinabuhi sa mga inosenteng mga sibilyan nga makalas kay mao may tumong ning ilang pundok ang pagpakatap sa mga terorismo agig pagbatok sa atong kagamhanan.

Usa ka adlaw niana, nahiabot si Joseph ug mga kaubanan sa siyudad sa Sugbo alang sa usa ka misyon. Dala nila ang ilang mga armas, mga bala, bomba ug uban pa nga gitago nila ilawom sa sinako nga mga prutas nga kunohay ilang itumod sa merkado sa Sugbo. Duha lamang ka adlaw ang tagal nga gihatag sa ilang labaw alang ning mao nilang tahas ug si Joseph mao ang mangulo sa pundok.

Didto abot ang pundok sa usa ka barungbarong nga giandam nang daan sa kontak nila nga taga Sugbo nga si Paing. Ang maong barungbarong nahimutang sa suok nga dapit sa eskuwater ug lisod tultolon sa tawo nga dili sinati sa maong lugar.

"Natultolan mo na ba ang dapit nga gipuy-an karon sa salbahis kong asawa, Bay Paing?" Sukna ni Joseph kang Paing samtang nagpahimutang sila sa dala nilang mga butang. Dugay na niyang gisugo si Paing kabahin niini.

"Natultolan ko na, Bos..." Ni Paing pa dayong hulbot sa usa ka papel gikan sa luyong bulsa sa gisul-ob niyang puro. "Ug nia kining mapa nga magtultol sa dapit nga ilang gipuy-an karon!"

"Maayo!" Ni Joseph pa dayong dawat sa papel nga gitunol ni Paing. "Si Tenyente Sunam ug ang akong asawa maoy unahon ko sa pagpaulbo, Bay Paing!"

Kanhi, malinawon ang pagpuyo nila ni Joseph ug Lucy didto sa Mindanao. Nabuhi lamang sila sa pagpanguma apan makakuwarta gihapon si Joseph kay daghan man sa ilang mga kasilinganan ang magpadaro kaniya sa ilang mga kaumahan ug hatagan siyag igo nga suhol. Samtang si Lucy nga iyang asawa namuhi og mga manok, baboy, kanding, itik ug uban pa nga ibaligya usab nila sa taboan sa ilang lungsod.

Usa niana ka higayon, may miabot nga pundok sa mga sundalo sa ilang dapit ug gipangharas ang mga kabalayan. Gipundok sa mga sundalo ang tanang mga kalalaken-an lakip na si Joseph didto sa dakong hawan ug gitionan sa tag-as nga mga armas. Gitagsatagsa og hiling sa mga sundalo ang ilang mga lawas aron masuta kun wala ba kini samad nga agi sa bala. May gigukod man gud silang samaran nga rebelde nga gituhoan nilang didto sa maong dapit motago. Ug si Lucy maoy nangaliyupo sa labaw sa mga sundalo nga si Tenyente Sunam nga buhian sila. Ug gibuhian gyud silang tanan nga walay tatsa ang lawas.

Sugod niadtong higayona, kanunay na nga mobutho sa ilang balay si Tenyente Sunam. Ug human sa pagpangligid sa mga adlaw kalit lang nawala si Lucy. Ug nunot sa pagkahanaw sa asawa ni Joseph wala na usab mopakita pa sa ilang dapit ang tenyente. Ulahi na dihang iyang nasayran nga giasayn na diay sa ilang kadagkoan si Tenyente Sunam sa Sugbo ug gidala niini ang iyang asawa. Tungod niini, naaghat si Joseph pag-apil sa pundok sa mga terorista!

Sayo sa buntag. Naukay ang mga tawo sa tibuok dapit dihang may usa ka sakyanan nga kalit lang mibangga sa usa ka hotel sa Sugbo nga gipuy-an usab ni Tenyente Sunam ug Lucy. Miulbo dihadiha ang hotel human sa makabungog nga buto sa bomba nga gituyo gayud sa pagbutang ni Joseph ug mga kaubanan sa sakyanan. Nakapahiyom si Joseph nga nakakita sa mga patay ug mga samaran nga mga lawas nga gipang-ugkat sa mga kapolisan ug kasundalohan gikan sa nalumpag nga hotel. Ug misamot pa gayud ang iyang kalipay dihang nasawod sa iyang panan-aw ang patay ug dugoong lawas sa duha ka binuhat nga demonyo alang kaniya.

"Natuman na ang sugo mo, Bos!" Ni Paing pa kinsa mao ang mimaneho sa gibangga nga sakyanan. Miambak siya sa sakyanan sa wala pa kini moigo sa hotel. "Isunod na ba nato ang mando sa atong labaw?"

"Napuhag ko na ang mga demonyo. Bay Paing ug nahunahuna ko karon nga dili na lang ipadayon ang atong misyon!"

Ug milakang si Joseph paingon sa nahimutangan sa mga polis aron motahan ug angkonon ang nahitabong pagpamomba! (Kataposan)