Ang Impiyerno ni Belen - 2

Gula 58

Wala’y kasayoran si Galen bahin sa komunikasyon namo ni Roger pinaagi sa text ug sa internet. Gililong ko kaniya ang bahin kang Roger aron dili siya ma-insecured. Sa akong paniid, seloso si Galen.

Sa kadugayan, nangulitawo nako si Roger. Gipaagi lang sa text ug sa chat ang iyang pagpaninguha nako. Sa kadugayan, gisugot nako si Roger. Hangtod nga akong nadiskobrehan nga weird diay si Roger bahin sa sex. Kanunay ming mag-phone-sex. Gusto gani niyang mag-sex mi on line. Ugaling lang kay wala may private room ang internet cafe nga akong gisudlan maong wala matigayon ang iyang gusto.

Milabay ang pila ka bulan. Usa ka adlaw niana, nanawag si Roger sa akong cellphone. Gipahibalo ko niya nga mokanaog na siya sa barko nga iyang gitrabahoan ug mopauli siya sa Sugbu. Gusto ni Roger nga magkakita na kami sa personal.

“Excited na kong magkita ta,” nagkanayon si Roger.

Wala ko motingog. Naglibog ko kun angay ba kong malipay o dili sa iyang gibalita nako. Mora ba’g dili pa ko andam nga makigkita niya sa personal.

Misantop sa akong hunahuna si Galen. Kun mopauli na unya si Roger sa Sugbu ug magpadayon usab ang affair namo ni Galen, duha na unya silang manginahanglan sa akong panahon.

Dili kaha makomplikado ang akong kinabuhi tungod nila ni Galen ug Roger? Nakapangutana ko niini sa akong kaugalingon. -- Sumpayan pa