Nakigbuwag sa dili niya uyab

Wa pa gani manugpa ang mga manok nga namatog sa may dakong sanga sa kamansilis didto na si Nisyo sa may tugkaran sa pinuy-anan ni Digna.

 Nakahukom na man lang god si Nisyo, nga puslan man nga wa gayod niya hitagamtami ang kadingding sa katam-is sa pagkababaye nga iyang gipaka-Bathala ning ilang dapit sa balangay Kapangian, mas maayo pa tuod nga makigbuwag na lang siya?

Dili lang tuyoon ... may mopasunding sa may ngilit sa iyang panumdoman ... ang kaparaygon sa tingog ni Digna nga magkanayon:

"Relax kalang kanunay Nisyo ... asa ra man na unya kun kita makasal?"

Ang labaw gayod niya nga gikatingad-an ... kang Digna, kun ngano nga bisan gani sa paghikap sa iyang kamot ... masuko man kini kaniya ug dayon iwakli?

Mas maayo man god unta ... kun madimdim na niya ang saro sa himaya, uban kang Digna, kay kini magpangita na man gayod kanunay kaniya? Unsa man tuod ang kapuslanan ... nga sa ilang panag-uyab ... wa man gayod siya makasuway og hawok, aron unta ukoban niya sa kapilit ang ngabil ni Digna?

"Nagmilagro ka man Syo ... nga misayo og pamisita kanako?" ni Digna pa nga hupong sa kaparaygon ang tingog.

Sa sinugdan ... nahiugnok sa makadiyot si Nisyo, ilabi na nga ang iyang duha ka mata didto gayod niya ipunting sa kabus-ok sa sampot sa maong babaye nga nakapasalimuang kaniya.

"Putlon ta na lang ang natagkos nga kahugot sa atong panaghigugmaay Digna?" ni Nisyo pa nga luhaan ang duha ka mata.

"Nabaligya ko na god ang bugtong kong kabaw nga igdadaro nga kabilin pa ni anhing Tatay Bartolo, gumikan sa imong kapritso nga kagustohan ... apan wa gayod ako makatilaw kanimo, aron hitagamtaman ko ang katam-is nga dili ika-pangagda!"

Siga pa sa iring banbanon ang duha ka mata ni Digna nga mitulisok kang Nisyo ug nagkanayon:

"Wa ka baliwa Nisyo ... nga dili man kita manag-uyab? Pagkabuang sad nako nga pagkababaye nga makig-relasyon kanimo ... nga ang imong hitsura ... dili man tipo nga angay kong higugmaon!"

Lupig pay tagolilong, nga mitalikod si Nisyo ... sa dapit sa pinuy-anan ni Digna. Way hunong ang kasubsob sa iyang mga bakho nga naglakaw nga nakigbuwag ni Digna nga dili diay sila uyab.

Wa siya’y lingi-lingi ... hangtud nga naabot siya sa ilang balay. (Kataposan)