Nakuratan si Takyo!

Pahanday nga naglingkod sa bangko si Takyo diha sa pantawan sa gamay niyang panimalay. Hapon kadto ug nagpahayahay siya kay hapo lagi gikan sa trabaho nga pamanday. Sa unahan, iyang nakita si Thelma nga nag-ihap sa halin niadtong adlawa ug pagtangka gyud sa may panawan nga nahimutangan ni Takyo, mitimbaya si Thelma.

"Oy, Takyo .... bagdoki ko bi....!" Matud pa ni Thelma dali misulod sa pantawan.

"Wa ko'y hilig 'ana, 'Day Thel....!" Tubag ni Takyo ngadto kang Thelma.

"Sulaye lang gud, kaigo diay...!" Pamugos ni Thelma dayong tupad kang Takyo.

Lagi kay pugsanon man si Thelma, gidawat niya ang pamugos. Namili siya sa gitunol ni Thelma. Dugay kaayo siyang nanghinol ug aron madali may gikuot si Thelma nga papel gikan sa iyang pitaka.

"Niay akong mentin, kini ang pakyawa....!" Gisuling ni Takyo ang mentin ni Thelma ug gisugdan ang paghiling. Gipakyaw ni Takyo ang mentin subay sa hangyo ni Thelma. Human sa pakyaw, mitindog si Thelma, apan una makasibat, mikidhat kaniya si Takyo. Mora'g nalanay sab ang kasingkarol ni Thelma sa kidhat ni Takyo.

Anak pinaangkan si Takyo, siya nalang ang nahibilin sa gamay nilang balay sukad mamatay ang iyang nanay Sepa duha na katuig ang milabay. Pamanday 'tawon ang iyang pangita. Maayong panday si Takyo ug daghan ang mangita niya nga motukod o magpaayo sa balay.

Hapit na lakdi sa udto ang pagkaulitawo ni Takyo. Kugihan siya. Way uyab. Dugay na siyang nagbahad kang Thelma apan lagi kay kulhanon, kutob lang siya sa kidhat matag sugat nila. Way eeeeeek, unsaon na lang?

Sayo sa buntag, diriyut masukamod si Thelma sa pantawan sa balay ni Takyo. Mahinangpon siyang nanuktok sa pultahan. Si Takyo nga nahagok pa sa banig, napugwat sa nagpungasi nga tuktok.

"Takyo....., Takyoooo! Bangon na diha oy....!" Singgaak ni Thelma. Mitimbakuwas si Takyo ug gibuksan ang pultahan.

"Ngano, 'Day Thel? Pangutana ni Takyo uban ang panghuy-ab.

"Sakto ang imo sa akong mentin. Igo gyud, way sipyat....!" Pahiyumon nga namulong si Thelma. Nakuratan si Takyo. Nakasabot siya sa gisulti ni Thelma. Mibalik siya sa iyang gihigdaan ug gikuha ilawom sa banig ang daghang linukot nga tiket. Mao gyud ang numero: 243: Nangurog siya ug hapit kuyapi sa kalipay. Kapin sa 30-mil pesos ang iyang daug. Unya, miduol siya kang Thelma ug wa lang tuyoa, gigakus ni Takyo si Thelma hugot kaayo. Ang nakalitan nga Thelma misukna kang Takyo.

"Unsaon mo karon ang imong daug....!" Sukna ni Thelma ngadto kang Takyo nga wa gyud moluag sa iyang gakus.

"Aw, kon mosugot ka, pakasal ta dayon....!" Ug miluag ang gakus ni Takyo kang Thelma.

"Na hala, ayaw dugaya kay mao sa'y akong ampay...!" Tubag ni Thelma dungan ang kusnit sa bugan ni Takyo.

Ang tinuod sad, dugay nang na-inlab si Thelma sa kabuotan ni Takyo ug nagpaabot lang kanus-a mohirit sa iyang gibati ang kugihan nga ulitawo. (Kataposan)