Ang Impiyerno ni Belen - 2

Gula 49

Sa kadugayan, akong namatikdan nga wala na motuo ang akong mga ginikanan sa akong mga alibi. Nareyalisar nako nga hapit na ko mabuking sa akong pagpamakak ngadto nila. Pero wala kini makapugong nako sa padayon nga pagpakigtagbo ni Galen.

Usa ka adlaw niana, nakaabot kanako ang balita nga may gikatingad-an ang katawhan nga nagpuyo sa Kabando nga maoy labing duol sa abandonadong balay nga tagboanan namo ni Galen. Nagtuo ang mga molupyo sa Kabando nga may engkanto nga nagpuyo sa maong balay.

Kini gong abandonadong balay nga tagboanan namo ni Galen may history bahin sa supernaturals. Gipanag-iya kini sa pamilyang Jalacan nga atua na karon nanimuyo sa Amerika. Kaniadto sa nagpuyo pa ang maong pamilya sa nahisgotang balay, kanunay silang nagreklamo nga tugawon sila matag karon ug unya sa dili kasarangan ug makahahadlok nga mga hitabo. Hangtod nga giabandonar gayod nila ang maong balay.

May mibanos pagpuyo sa maong balay, ang pamilyang Libara. Pero wala magdugay ang maong pamilya sa pagpuyo sa balay sa mga Jalacan. Kanunay silang hasion sa usa ka multo. May mga gabii nga makadungog sila’g mga tunob ug inaringkil sa kadena sa sala sa balay pero wala sila’y nakita bisan anino na lang sa tawo nga maoy matumbok nga tag-iya sa kahibulongang mga tunob. Maong gibiyaan sab sa pamilyang Libara ang maong balay. -- Sumpayan pa