Nalangan nga kabuntagon

Gula 24

“Giingnan lang ko niya nga panggaon ta ka kay pinangga ra ba kuno ka kaayo niya.”

“Mao kanay iyang gisulti nimo?”

“Oo.”

Kahilom. Mikipatkipat ang mga mata ni Destiny. Dihay iyang gihunahuna apan wala niya matugkad ang giladmon niini.

“Ayaw lang kalain, Destiny, ha,” mitingog si Devin pagkilab sa pipila ka daklit.

“Ngano man diay?” Usisa sa dalaga.

“Dugay na man kong nakamatikod niini.”

“A-ang unsa ba?”

“Nga mora’g dili mo managsuon si Evan.”

“U-unsa?”

“Bitaw. Bisan unsaon nako’g tan-aw, dili gyud magka-amgid ang inyong panagway.”

“Siyempre. Lalaki gud siya ug babaye ko. Matud pa sa among parents, si Kuya Evan ang miliwat kang Mommy samtang ako tua miliwat kang Daddy.”

“Mao ba?”

“Yes, that’s it, Devin.”

Nahilom na usab sila.

“Tuod, Destiny,” ni Devin pa nga mibuak sa kahilom. “Mianhi ko tungod sa mahinungdanon kaayong tuyo.”

“Maayo ra gyud nga mianhi ka ron,” ni Destiny pa. “Mamauli na ra ba mi sa probinsiya ugma.”

“Mao ba? Diriyot diay ko mauwahi.” -- Sumpayan pa