Gula 19
Gipabudlot ni Destiny ang iyang simod.
“Bitaw,” ni Evan pa. “Break na mi.”
“T-tinuod?” Mora’g nahinangop si Destiny.
“Oo. Mga one week na tingali. Wa na mi magkasinabot.”
“Maayo hinuon nga nagbuwag na mo. Wa gyud ko makagusto niadtong babayhana para nimo.”
“Pastilan kining manghora. Mora man og mao nay mamili og ideal woman para nako.”
“Siyempre. Managsuon gud ta. Ang babaye nga imong maasawa ako na unyang sister-in-law. Mahimo na unya siyang sakop sa atong pamilya. Busa angay lang nga motabang ko’g panghimbis.”
Igo lang nakapanglingo si Evan sa iyang gisulti. Unya gitibawas nila ang pangaon.
Nagtuo si Destiny nga si Liz mao nay kataposang babaye nga dad-on ni Evan sa apartment nga ilang gipuy-an. Apan nasayop diay siya. Kay usa niana ka gabii sa pagpauli ni Evan, nagtangkil na usab kini’g babaye.
Diha siya sa sala sa pag-abot sa duha. Gikidhatan siya ni Evan aron dili siya mosigay. Wala na lang siya moik. Ang babaye gidiretso sa iyang maguwang sa kuwarto niini. Igo lang nakapanglingo si Destiny. Palikero gyud si Evan bisan unsaon!
“Kinsa na man sab to?” Gipangutana ni Destiny ang maguwang dihang nakapauli na ang babaye.
“Si Alexa,” maoy tubag. -- Sumpayan pa