Nalangan nga kabuntagon

Gula 18

Gusto siyang mapitol ang pagka-palikero ni Evan. May mga higayon nga makahunahuna na siyang isumbong ang binuhatan sa iyang maguwang ngadto sa ilang mga ginikanan. Apan nagpugong lang gyud siya. Nabalaka man gud siya nga tingalig masuko gayod si Evan kaniya kun iya kining buhaton. Gawas pa, wala man usab maapektuhi ang pagtuon sa iyang maguwang sa pagka-palikero niini. Wala pasagdi ni Evan ang iyang pagtuon.

Mao nga gipasagdan lang ni Destiny si Evan. Bakikaw man sab hunahunaon nga siya nga manghod mao na hinuon ang magpunay og pamadlong sa iyang maguwang. Nareyalisar sab niya nga kun magkinaunsa man, walay mawala kang Evan tungod kay lalaki man kini. Ang alkanse mao ang mga babaye nga gidula-dulaan lang niini.

Madasigon silang nangaon karong buntaga. Nag- komedyahay pa gani sila sa atubangan sa kan-anan. Gisungog si Destiny ni Evan bahin kang Greger, ang lalaki nga maoy gibuya sa ilang mga ginikanan kaniya. Agi’g balos, gisungog usab niya ang maguwang bahin kang Allison, ang babaye nga maoy gitupo sa ilang mga ginikanan ngadto niini.

Hangtod nga ang ilang pagsungogay misangko kang Liz.

“Wa na lagi nimo dad-a si Liz dinhi sa atong gipuy-an, Kuya?” sukit ni Destiny.

“Di na siya moanhi,” tubag ni Evan. “Nahadlok siya nimo.” -- Sumpayan pa