Paboritong anak

Nganong nagpaimportante ka mas imong pagkatawo? Unsa may kaayohang nabuhat nimo?" nagpangumo si Sendo atubangan sa gate gawas sa balay ni Brendo iyang maguwang. Ning sayong kahaponon, si Sendo ang gipatawag sa ilang amahan nga si Tatay Doming nila, kay ang tiguwang gustong mobalhin og puyo ngadto sa ilang Sendo.

Kay sa balay sa kamaguwangan nga si Brendo, way kalipay ang tiguwang. 84 na si Tatay Doming nila, napulo ka tuig nang biyudo. May pension nga dolyar kay US Veteran man siya. Si Brendo ang magdawat unya mantinihan lang ang tiguwang sa sud-an nga buwad, ginamos, kaling ug humay nga NFA. Ang labing dako sa iyang pension mapunta lang sa madyongan kay sugarol man si Brendo. Ulitawong guwang si Brendo ug kanhi maoy paboritong anak sa tiguwang kay maayo man kaayo mosipsip. Karon, nakaamgo na ang tiguwang sa iyang sayop. Nga ang ikaduha ug kamanghuran niyang anak nga si Sendo, mao diay tinood nga nagpangga niya.

Bisag taphaw lang ang pagpangga ni Tatay Doming ngadtong Sendo kaniadto sa mga gagmay pa iyang mga anak, si Sendo wa magbaton og kasilag sa amahan. Kay nakasabot ra siya nga tawhanong kinaiya sa usa ka amahan nga duna gyuy mas labaw nga gimahal sa iyang mga anak. Gipakita lang sab niya ang iyang amahan nga bisag second best lang siya nga pagkaanak, naningkamot siya nga ugma damlag makaamgo iyang amahan nga angay sab siyang daygon.

Si Brendo ginastohan sa pagtungha sa ilang amahan. Gipapilig bisan unsang kurso. Tulo ka kurso ang nasugdan. Apan puro lang sugod. Way gitapos. Kay maglabi ang panahon ni Brendo sa barkada, inom, sugal, hogoyhogoy, panguyab ug mga burikat. Apan luyo niining tanan, gipatukuran pa gyud og balay ni Tatay Doming si Brendo, sa iyang yuta sa baryo Takil.

Si Sendo, dili tungod sa kahiubos, kun dili sa pagkaway oportunidad nga makuha gikan sa amahan, pagkahuman niyag hayskul, nanarbaho sa dakbayan. Nakatrabaho siya isip clerk/typist sa opisina sa usa ka CPA. Nagkugi siya. Nagtinarong sa serbisyo. Naayonan sa amo ug giumintohan sa suweldo. Hangtud niabot ang higayon nga makaabot na siya’g gasto sa iyang kaugalingong pagtoon. Giswerte sa iyang paningkamot ug nahimo sang usa ka CPA.

Naminyo si Sendo, nagpakasal sa iyang hinigugma nga iya rang klasmet nga way mga paryenteng nitambong. May duha ka anak lalaki na siya. Ug mga bayongbayong na karon. Tua na siya namuyo sa Green Meadow Village sa Talamban. Ug may opisina siya sa Subangdaku.

Sa niaging gabii, nadani iyang pagtagad sa baga nga sobre sa iyang lamesa. Gikan ni Mr. Domingo Gairanod. Gibasa niya og dali. Nitulo iyang luha paghuman niyag basa. Ug gibati niya ang kalagot sa iyang maguwang. Kay nasayran niya kun giunsa ni Brendo ang ilang Tatay.

Nag-angkihod ang tiguwang nigawas sa balay ni Brendo. Dugay nang may artraytis. Apan wa gyud patambali ni Brendo. Nagpangagoy nga nisakay sa kotse ni Sendo nga nag-parking atubangan sa gate.

"Mangunsulta nya kog abogado. Kay bawion nakos Tatay!" pulong ni Brendo nga nagbarog sa pultahan sa iyang balay.

"Pangunsulta lang. Kay igo na kaayo ang suwat ni Tatay ipapilit sa tubag unya sa imong petisyon, kun giunsa siya pagpangga sa iyang paboritong anak!" ni Sendo.

"Pinangga ko na si Tatay oy!" ni Brendo.

"Pinangga sa insulto ug bugalbugal atubangan sa mga tawo!" ni Sendo. Dayong liput sa luyo sa kotse human mahiluna sa front seat iyang tatay dala ang gamay nga bag.

"Buang ka man kaha!" pwerteng lagota sa maguwang nga nasayud iyang manghod sa iyang kasalbahis. Nagwarawara iyang kinomo. Nihana og gawas sa gate aron konprontahon ang manghud.

"Dali! Duol!" gikamay siyang Sendo. Nga karon niporma sa iyang paboritong fighting stance sa Tae Kwon Du.

"Kaniadto sa gagmay pa ta nga mahimo lang ko nimong dulon, pawngan, dapogon, labtikang dunggan o ilong. Karon dili na. Dali. Duol aron makatilaw kas akong lightning kicks!" nagpangamay si Sendo.

May black belt na siya sa Tae Kwon Du. Niduko na lang si Brendo. Nanglipaghong sa kauwaw. Maghuwat na lang unya siyas hukom sa iyang amahan. Kun unsay mahitabo niya. Kay wa gyud siyay nakat-onang trabaho. (Kataposan)