Makauulaw angkonon

Sulod sa sala sa Regional Trial Court, Branch 77 ning dakbayan, niundang kadiyot ang bista karong hapona kay may emergency telephone call ang huwes. Nag-recess una siya ug nisulod sa Judge's chamber.

Gipahimudsan ni Atty. Charlie Gomez, 60 anyos, ang higayon. Giduol niya ang stenographer nga babaye nga nagsigi lag doku sa lamesa nga nagsuwat.

"Tess, mahimo bag sultihan ko nimo og unsay sala nako? Kay mangayo lang kog pasaylo. Di ko gustong dunay tawo masilo nako. Sa sobra trayenta anyos nakong panglaban, wa gyud koy gikaaway nga empleyado sa husgado. Gusto kong amigo nako tanang tawo," sa abogado. Niyahat ang babaye. Nitutok niya. Nagmug-ot ug isog ang tinan-awan.

Nahinumdum si Charlie nga sa niaging buwan panahon sa recess sulod sa husgado, nagtsekatseka sila ni Tess. Nagkinomedyahay. Unya kalit lang niingon si Tess "Attorney, makahimo pa kaha ka?"

Trayenta anyos pa si Tess. Daga pa. Gitubag ni Charlie ang pangutana. Lawom kaayo ang gihunahuna ni Tess human nakadungog sa tubag. Wa na dayon magtingog.

Unya human adto, bisag asa sila magkasugat, di na motagad niya si Tess. Sa una, mapahiyomon kaayo kini ngadto kaniya. Maong dunay guilt feeling ang abogado. Tungod ba kaha sa iyang tubag sa pangutana ni Tess?

"Sige na Tess. Bisag moluhod pa ko sa imong atubangan," ni Charlie. Nakatawa ug nakapahiyom ang Interpreter nga si Nolie. Nagbarog siya duol sa lamesa ni Tess. Daw nasayud na siyag unsay gikasuk-an ni Tess sa abogado. Apan di lang una siya mointerbener. Nagtotok lang gihapon si Tess sa abogado nga masuk-anon.

"Wa man ko manguyab nimo. Wa ko motsansing nimo. Nasayud ko nga maanyag ka. Madanihon. Apan kutob ra ko sa pagdayeg sa imong kaanyag. Kay una sa tanan, minyo kong dako. Guwang pa gyud. Nangapo na gani’g daghan. Gusto lang ko mauli atong relasyon isip managhigala. Inigsoon o inamahan akong pagtagad ninyong mga taga-husgado," ni Charlie nga daw nagdiskorso. Sila ra may nahibilin sa husgado. Kay ang ubang mga abogado ug ilang mga kliyente nanggawas kay mang-snacks.

"Bitaw Tess. Sultihis attorney unsay sala niya. Aron makapangayog pasaylo," ni Nolie nga daw nalooy sa abogado.

"Imo man god kong gibinastosan sa imong tubag!" ni Tess nga nikalma na ang hitsura.

"Hain adtong tubaga?" ni Charlie.

"Kadto gong gipangutana tika kon makahimo pa ba ka?" ni Tess. Seryoso ang hitsura.

"Kanang pangutanaha. Dili ba na binastos o bugalbugal? Kana god, personal na kaayo nga pangutana sa usa ka tiguwang lalaki. Busa, gi-personal ko sab ang tubag. Kay gusto ka mang masayod kun makahimo pa ba ko, giingnan tika nga sulayi lang unya panabi inig ka human. Unsa may binastos sa akong tubag?" ni Charlie. Nibukhad sa iyang duha ka palad.

"Dugay dugay gyud nakong pinsar sa imong tubag. Maong wa na lang ko nisumpay. Unya pag-abot nakos amo, nasabtan nako nga ako man diay mahimutang sa kaulaw. Kun di ka kahimo, akong ipanabi. Ako’y maulawan. Kun kahimo ka, akong ipanabi, ako gihapoy maulawan," ni Tess.

"Maong wa tika tubaga og tarong kay komedya ra man imong pangutana. Komedya ra sab to akong tubag. Usbon ko na lang akong tubag. Kun gusto kang mosuway, ay na lang og ipanabi" ni Charlie. Nangatawa si Nolie ug Tess.

"Sakit sab gyud hinoon isipon nga di na ko kahimo. Makauulaw angkonon. Apan wa tay mahimo. Dawaton na lang ang dagan sa kinaiyahan. May bahin gyud sa atong lawas nga bisag diha na daan pagkatawo nato, mouna og kamatay" ni Charlie. Nagpahiyom.

Nagkinataw-anay na silang tanan. Ug nasigpatan ni Nolie nga nigawas na ang huwes sa iyang chamber.

"ALL RISE. Session resumed. Silence is enjoined!" mando ni Nolie sa tanang naa sulod sa husgado. (Kataposan)