Ang luwag nga kahibulongan

Nagpunay na lang hinuon og hinuktok si Tonyo sa dihang nakita niya nga nag-anam na kadaghan ang mga tawo nga midugok sa kasal sa iyang pag-umangkon nga si Jun Riel.

Nabalaka kaayo siya kun paigo ba kaha ang mga pagkaon nga ilang giandam, alang sa mga bisita. Gamay ra man gud kaayo ang ilang hikay. Kay nagtuo man gud sila nga dili kaayo dugokon ang maong kasal, ilabi na kay naa ra kini sa usa ka sityo.

Siya man guy nabalaka pag-ayo, kay siya ra ba maoy gipiyalan sa iyang igsuon sa pagdala sa hikay ug ingon man ang pag-abi-abi sa mga bisita sa panahon sa tingkaon.

Simbako uroy og mahutdan sila sa mga pagkaon, dili dako kaayo nilang kauwawan. Kay gawas nga siya maoy gipiyalan sa maong hikay, uyoan pa gyud siya sa gikasal. Anak man gud si Jun Riel sa iyang igsuon. Busa, iya usab kining pag-umangkon.

Samtang nagsigi og hinuktok si Tonyo, may usa ka tiguwang nga lalake ang miduol kaniya. Tag-as kaayo og buhok ang maong tiguwang ug bungoton pa gayud. Taliwtiw hinuon kaayo og ilong. Ug may pagkapuwahon ang pamanit niini.

"Unsay imong gihinuktokan, Dong?" Nangutana kaniya ang tiguwang.

Sa sinugdanan, wala lang unta kini talingaha ni Tonyo. Apan, kay miusab man kini sa pagpangutana kaniya, maong iya na lang gayud kining gitug-anan sa tinuod. Iya kining gisultihan, bahin sa iyang gikabalak-an. Nga nabalaka siya nga tingalig mahutdan sila sa mga pagkaon.

"Ayaw kabalaka nianang imong suliran. Kay tabangan ko ikaw," sa tiguwang pa ngadto kang Tonyo.

Unya, nahibulong na lang si Tonyo, kay gihatagan naman hinuon siya og luwag sa tiguwang. Usa ka luwag nga hinimo sa bagol ug kawayan.

"Gamita kanang luwaga. Kay makatabang kaayo kana kanimo," sa tiguwang pa gihapon, dayon og lakaw. Wala nalang gani kini kapasalamati ni Tonyo kay mikalit man lang kini kawala sa iyang panan-aw.

Sa dihang gisugdan na ang pagpakaon ang mga tawo nga mitambong sa maong kasal, si Tonyo gayud maoy nangunay sa pagpanukad sa mga sud-an. Maoy iyang gigamit ang luwag nga hinatag kaniya sa tiguwang.

Sa pagbanabana pa ni Tonyo, mora gayud og duha ka baryohan ang mga tawo nga nanugok sa maong kasal ug nangumbira. Dihay mga tiguwang. Diha usay mga batan-on, ug diha pa gani mga bata.

Ug nahibulong na lang kaayo si Tonyo, kay mora man og wala kaibani ang mga pagkaon. Daghan pa kaayo ang mga sud-an diha sa ibabaw sa mga lamesa nga gipangsumpaysumpay. Ug ingon man usab sa mga dagkong kaldero ug mga kaserola.

Gani, nag-abot-abot ang daghang mga tawo, nga gikan sa nagkalainlaing mga dapit. Diha pa gani uban kanila nga misubli na sa pagkaon. Ug makamatngon pa gani usahay si Tonyo nga dunay pipila niini, ang manulod og mga sud-an sa plastik nga ilang dala, aron dad-on ngadto sa ila.

Apan bisan pa niini, wala lang gihapon mohunong si Tonyo sa pagpangagda, kutob sa tawo nga iyang makit-an. Nagsalig lang siya, kay daghan pa man kaayong nahibiling mga sud-an.

Samtang nagpunay og pangagda si Tonyo, nasigpatan niya ang tiguwang nga maoy naghatag kaniya sa luwag. Iya dayon kining gisenyasan aron pakaunon. Apan igo lang kining mibawos kaniya sa pagwarawara ug mapahiyumon kaayo. (Kataposan)