Ang Impiyerno ni Belen - 2

 Gula 39

“Likay kamo sa tentasyon,” gikan ni Mama. “Ayaw kamo pagpadala sa bul-og sa inyong mga pagbati. Nasayod ka na tingali kun unsay buot kong ipasabot.”

“Ayaw mo kabalaka, Pa, Ma,” nako pa. “Hinumdoman ug tamdan nako kanunay ang inyong mga pahimangno.”

Paglabay sa pipila ka adlaw, mihagad si Galen nga mangaligo mi’g dagat.

“Unsay okasyon?” Gipangutana ko siya.

“Birthday nako,” laktod niyang tubag.

“Asa man ta mangaligo?”

“Sa Marcelo Beach. May lain pa tang kuyog. Bale...pito tang tanan. Magsakay ta’g multicab paingon didto.”

“Um...di pa ko makaseguro kun makakuyog ko. Depende kun tugotan ko nila ni Papa ug Mama. Pero akong paningkamotan.”“

Maayo gani kay sa pagpananghid nako sa akong mga ginikanan, nisugot sila. Maong nahikuyog gyud ko sa pagpangaligo’g dagat sa grupo ni Galen.

Alegre kaayo ang among pagpangaligo og dagat sa Marcelo Beach. Nahinangop mi tungod sa katin-aw sa dagat.

Sa sinugdan, diha ra mi si Galen nangaligo duol sa gikaligoan sa among mga kauban nga sila si Harry, Beth, Nestor, Paris ug Denton. Pero sa kadugayan, nagpalayo mi nila. -- Sumpayan pa