Gula 35
“Unsay gusto mo nga akong dad-on ini’g pamisita nako nimo? Nangutana si Galen paglabay sa pipila ka daklit.
“B-bahala ka,” mao ray akong gitubag.“Ikaw ang maantigo.”
“A, sige. Ice cream lay akong dad-on.”
Ug gikuha ni Galen ang akong cellphone number. Gusto niyang magkakontakay mi kanunay matag karon ug unya.
“Mo-text lang ko nimo kun kanus-a ko mamisita sa inyo,” ni Galen pa sa dayon na namong pauli sa tagsatagsa namo ka pinuy-anan.
Pag-abot nako sa balay, nakadawat ko’g text gikan ni Galen. Iya lang gi-check kun nahiabot na ba ko sa balay. Gitubag ko ang iyang text.
Sa didto na ko sa sulod sa akong kuwarto, nagpusot-pusot ang mga text gikan ni Galen. Bisan unsa lang ang mensahe nga iyang gipadala nga makapatambok sa kasingkasing sa usa ka babaye.
Nahimuot ko sa mga text ni Galen. Flattered ko sa iyang mga mensahe labina kun magdayeg na siya sa akong pagka-babaye -- sa akong katahom. Naay “kilig factor” ang iyang mga text alang nako.
Hangtod sa pagkagabii nagsige’g text si Galen nako. Dihang hapit na ko makatulog, iya kong giteksan nga mamisita siya nako sunod nga gabii. Gitando ko siya. Ug gibati ko ang excitement. -- Sumpayan pa