Morning na Sir

Gipul-an na si Lito sa shifting sa iyang trabaho nga kanunay'ng pang'gabii ... magsugod sa alas onse sa tungang gabii hangtod sa alas siete sa buntag. Magtulo na ka bulan, diretso, way ilis-ilis. Nahibulong na siya nga wala gyud siya ibutang og pang'adlaw sa iyang supervisor.

Dili pareho sa iyang mga kauban nga maoy rotisyon ang oras sa ilang trabaho matag semana. Nagduda na siya nga ang gibuhat kaniya gituyo ug may kalabotan sa mga hungihong nga si Mila ... iyang asawa ... may relasyon ni Mr. Totinpor, ang manedyer sa ilang departamento, Mill Dept., Atlas Mining, Lutopan, Toledo.

Misuway si Lito paghangyo sa ilang supervisor nga ibutang siya sa pang'adlaw, apan wala siya tugoti, kaysi Mr. Totinpor maoy nagbuot sa oras sa iyang i'trabaho. Wala na lang siya mamugos. Mo-terminate ra ba dayon ni si Mr. Totinpor sa trabahador nga mosupak sa iyang isugo. Dili pa panahon nga mataktak siya sa iyang trabaho. Pahumanon pa niya ang iyang bugtong anak, nga usa na lang ka tuig ang kulang, makatapos na sa kursong nursing.

Si Mr. Totinpor notado sa iyang pagkahimabaye. Kasagaran sa iyang nabiktima, asawa og trabahador nga sakop sa iyang departamento. Haylo-on ang asawa og kuwarta ug pasaligan nga i-promote ang posisyon sa iyang bana, kun kini makigdulog kaniya. Kun dili madala sa haylo, hulga-on nga tak'takon ang bana sa iyang trabaho. Ingon niini kangil-ad ang modus sa iyang pangbiktima. Walay nang'reklamo. Kadaghanan gud sa iyang trabahador mga pahenante ... sama ni Lito ... walay grado, mag-uma lang ang nahibaw-an. Nakasulod sa trabaho kay rekomendado sa tag-iya sa yuta nga giminahan sa kompaniya.

Alas tres sa kadlawon, gitawag si Lito sa iyang supervisor aron patabangon pagdiskarga sa mga 'steel balls' nga gikan sa Foundry Dept., Sangi, Toledo. Gibati og kaluoy ang supervisor nga nakakita sa nawong ni Lito nga puerteng luspara ug namawok ang duha ka mata. Nagkalibanga diay si Lito. Inay patabangon pagdiskarga sa 'stell balls', iya kining gipa'pauli aron makapahulay sa balay ug makaa'bot sa alas kuwatro nga biyahe sa Corominas Bus, nga maoy mohatod sa mga pasahero gikan sa Lutopan hangtud sa Toledo ug Balamban.

Mihunong ang Corominas Bus sa eskina sa baryo Magdugo. Mikana-og si Lito. Hinay ang lakang tungod sa gibati'ng kaluya. Milantaw sa ilang balay ... mga singkwenta metros ang gilay-on gikan sa iyang gikanaugan. Mikuba ang iyang dughan sa iyang nakita. Bisan may kangitngit pa ang alas singko sa kabuntagon, klaro kaayo sa iyang panan-aw ang service pick-up ni Mr. Totinpor nga gi-parking og diyes metros saylo sa ilang tugkaran.

Ang kaluya ni Lito, gipulihan og talagsa'ong kusog sa pangabubho. Tinuod diay ang mga hungihong nga may salawayong buhat ang iyang asawa, makigdulog ni Mr. Totinpor makadlawon. Mao diay nga kanunay siyang gidistino ug pang'gabii.

Hilom, walay kasikas nga misulod si Lito sa ilang panimalay. Gikan sa sala, bantang kaayo ang lawas ni Mila ug Mr. Totinpor nga naggakos. Pulos nahinanok. Nakalimot pagsul-ob og balik sa ilang sapot, hasta sa paghabol ug pagsira sa pultahan, kay gidaug sa kakapoy ug katulogon sa ilang kinawat-kawat nga kalipay.

Nagkuha og kutsilyo si Lito sa kusina aron patyon ang duha, apan, nausab ang iyang hunahuna. Inay patyon, himo'an niya ang duha ka lawas ug timaan nga dili mapapas. Paslotan niya ang nawong pinaagi sa binukal nga tubig, aron ang uwat magpahinumdom kanunay sa ilang binuhatan. Gibalik og butang ang kutsilyo sa butanganan. Gikuha niya ang takuri, gipuno ug gipabukal.

Dihang ibu'bo na unta ni Lito ang binukal nga tubig ... gilamat ang iyang panan-aw. Maoy iyang nakita, diha sa nawong sa iyang asawa, ang panagway sa iyang anak. Naghilak, nagpakilooy nga dili ipadayon ang buot niyang himoon.

Sa dakung kahimatngon nga siya ug ang iyang anak mao ra gihapoy mag-antus sa kaulaw, gipukaw ni Lito si Mr. Totinpor,..."Sir...Sir ... Morning na Sir!" (Kataposan)