Ang esnatser

Oy, Dong! Maluoy ka intawon. Tabang! Tabang!" Misinggit si Iyo Karpo sa nagkurog nga tingog. Duha ka buto ang milanog gikan sa armas sa usa ka polis nga nahadungan pagkanaog sa mga pasahero sa bapor. Apan nakalayo na ang esnatser ug wala na kini hiapsi sa polis.

"Unsay nakuha gikan kanimo Iyo," nangutana ang usa ka pasahero.

"Nadala ang puntil nga gisudlan sa selpon ug kuwarta," kahilakon ang tigulang sa kalit nga hitabo. Nahinumdom siya sa gitugon sa iyang anak nga dad-on gayod ang maong kantidad kay gikinahanglan sa operasyon sa iyang apo.

"Okey ka lang, Iyo," matud sa polis ngadto sa tigulang nga naghinuktok.

"Naguol kaayo ko, Sir, kay kadtong kuwarta nga na-esnats, alang to sa operasyon sa akong apo."

"Naka-may-ong ka sa esnatser Iyo?" mitimang ang usa ka polis nga bag-ong nahiabot dala ang patrol car.

"Kun makit-an ko pag-usab, makaila tingali ko," sa tigulang nga wa pa mawala ang pagpangurog.

"Na, hala, adto ta sa presinto aron imong ikatudlo sa mga retrato sa mga esnatser. Sakay na sa patrol car Iyo."

Didto sa presinto, gipagawas sa polis ang mga retrato sa mga esnatser.

"Tan-awa dinhi sa mga retrato sa mga esnatser kun hain niini ang imong namay-ongan."

"Wa man dinhi Sir," ni Iyo Karpo nga nagtan-aw sa mga retrato, "ambot lang kaha ning usa kay medyo amgid-amgid."

"O, sige, ato nang ipakatap sa atong mga aset ang kartograpik ana," matud sa imbestigador. "Ihatod ka lang namo sa imong adtoan."

"Pero, sir, wa ra ba ko katultol sa gipuy-an sa akong anak kay iya man lang kong tawgon sa selpon, apan naapil man sa pag-esnats ang selpon."

"Wa nay problema," matud sa hepe, "ato lang nang isibya sa mga radyo ug TV. Sige, anhi ka lang una magpaabot."

Nianang pagka-ugma sa gabii, miabot ang iyang anak nga si Belen human makita sa balita sa TV mahitungod sa iyang amahan.

"Papa, nabalaka kaayo mi kun hain ka na," migakos si Belen sa amahan nga naghilak. "Nakabsan gyud sa kinabuhi ang bata."

"Yuna pa," miliraw si Iyo Karpo nga may gipangita, ''hain man ang imong bana?"

"Way hinungdan nga pagka-bana. Maayo la'g mouli, hubog pa gyod," padayon nga dangoyngoy ni Belen. "Wa gani siya masayod nga patay na ang iyang anak."

"Kun wa pa ko ma-esnatsi, buhi pa tingali ang akong apo," mahay ni Iyo Karpo sa kaugalingon.

"Iyo Karpo," matud sa usa ka polis, "tan-awa ra ning hulagway sa mantalaan."

"Oy! Mao man ni ang nag-esnats sa akong kuwarta ug selpon."

"Ambi no, Pa, tan-awon ko," matud ni Belen. "Papa! Si Gomer man ni, ang akong bana, gipusil patay!" (Kataposan)