Nalangan nga kabuntagon

Gula 9

“Mao lagi na. Di nimo tinud-on si Liz. Unya kun simbako momabdos nang babayhana, unsaon na man lang? Malintian ka gyud ni Daddy.”

“Ako nay bahala niana. Basta ayaw lang gyud tug-ani sila si Daddy ug Mommy bahin niya. Okey?”

Wala motingog si Destiny.

“Silence means yes,” sa maguwang pa nga nagtingsi.

Dayon gihagkan ni Evan ang iyang aping. Ingon sa napuypoy lang usab dayon ang iyang kalagot ngadto sa iyang maguwang dihang giparaygan na siya niini.

Ingon niana ka-loving silang managsuon. Sila ra man gong duha ang mga anak sa ilang mga ginikanan. Buhong sila sa tanang mga butang materyal. Ug gitudloan sila sa ilang daddy ug mommy nga magminahalay sa usa’g-usa.

Kaniadto gani sa mga gagmay pa silang bata, sila rang duha ang kanunay magkauban sa duwa. Mangulipi si Destiny kun makigduwa si Evan sa anak sa ilang silingan. Gusto niya nga siya ray pakigduwaan sa iyang maguwang.

Nahinumdom usab si Destiny nga kaniadto sa bata pa siya, dili siya makatulog kun dili motupad si Evan sa paghigda kaniya. Pakantahon niya si Evan aron makatulog siya. Usahay gani, magpasabak siya ni Evan aron dali ra siyang makatulog. -- Sumpayan pa