Nalangan nga kabuntagon

Gula 4

Mao nga kun masayran sa ilang daddy nga nagbinuang si Evan sa mga babaye, seguradong malintian gayod kini. Nasayod si Destiny nga usa sa supak kaayo sa kabubut-on sa ilang amahan mao ang pagbinuang sa mga lalaki ngadto sa mga babaye pinaagi sa pagpahimulos sa ilang kahuyang ug ubang matang sa imoralidad. Ugaling lang kay nagpakahilom lang si Destiny. Wala gayod siya motug-an ngadto sa ilang mga ginikanan sa matuod nga binuhatan sa iyang maguwang. Dili siya buot nga hikasuk-an ang iyang Kuya Evan sa ilang mga ginikanan.

Usa pa sa laing hinungdan kun nganong gidid-an sila sa ilang mga ginikanan sa pagsulod og relasyon tali sa opposite sex mao nga may napili na ang ilang mga ginikanan nga maoy mamahimo nilang kapikas sa kinabuhi sa higayon nga gusto na silang magminyo. Si Destiny gibuya na ngadto kang Greger nga anak sa abogado sa iyang daddy. Samtang si Evan gibuya na usab ngadto ni Allison nga anak sa kasosyo sa negosyo sa ilang mga ginikanan. Niini nga kahimtang, ingon sa gihikawan na sila sa ilang mga ginikanan pagpili sa binuhat nga ilang higugmaon. Apan wala sila’y mahimo; mga anak sila nga masinugtanon ngadto sa ilang mga ginikanan. -- Sumpayan pa