Nalangan nga kabuntagon

Gula 3

Gani, sa tuyo nga wala gayo’y makabalda sa ilang pagtuon, mikuha ang ilang mga ginikanan og usa ka unit nga apartment nga sila rang duha maoy nag-okupar. Mao ray ilang kauban sa balay si Nang Nema nga maoy mag-atiman kanila. Si Nang Nema maoy maghikay sa ilang pagkaon, manglaba sa ilang mga sapot ug sa uban pang bulohaton sa balay. Gituyo pagkuha sa ilang mga ginikanan si Nang Nema aron maoy mahimo nilang katabang aron gayod matingob ang ilang panahon sa pagtuon. Managsama sila’g unibersidad nga gitunghaan.

Dako ang tinguha sa ilang mga ginikanan nga makatapos sila og kurso sa kolehiyo. Si Destiny third year college sa kursong nursing samtang si Evan fourth year college na usab sa kursong computer engineering. Mao nga gibaoran sila sa ilang mga ginikanan nga maglikay gayod sa uyab-uyab.

Estriko ang ilang mga ginikanan bahin sa ilang lovelife. Ang ilang pamilya nahitalay sa hataas nga hut-ong sa katilingban ug usa sa labing adunahan sa lungsod sa Pinamungajan. May impluwensiya ang ilang mga ginikanan sa ilang lungsod. May kadungganan kining giampingan nga dili gustong maduhigan og mansa nilang mga anak. Sakop ang ilang mga ginikanan sa Couples For Christ. Ang ilang daddy usa ka grand Knight sa Knights of Columbus sa ilang lungsod. --Sumpayan pa