Gula 1
Paghimuntog ni Destiny sa sala sa balay, napahunong siya sa paglakaw dihang nadungog niya ang tingog sa lalaki ug babaye nga naggikan sa sulod sa lawak sa iyang kuya Evan. Nakaila dayon siya sa tingog sa babaye.
“Nia na sab ning kondatan!” Bagutbot ni Destiny sa hilom. “Igat gyung dako.”
Ang buot ipasabot ni Destiny mao si Liz, ang uyab sa iyang maguwang. Anaa ang duha sulod sa kuwarto. Alang kang Destiny walay respeto si Liz sa kaugalingon niini. Walay delikadeza. Kanunay nang buhaton ni Liz ang pagsulod sa lawak sa iyang maguwang ug wala siya makauyon niini.
Misugmat ang kalagot ni Destiny. Wala na siya mahinayon pagsulod sa iyang lawak. Mibalik siya’g gawas sa balay, mipara og taxi ug nagpahatod ngadto sa usa ka outlet sa Jollibee. Didto nanihapon siya.
Samtang nagkaon, sila si Liz ug kuya Evan niya ang iyang gihunahuna. Unsa na kahay gibuhat sa duha karon. Hilom siyang nakapangutana sa iyang kaugalingon. Unya gibati niya nga ingon sa nahasol pag-ayo ang iyang hunahuna.
Paglabay sa kapin usa ka oras, mibalik na si Destiny sa balay. Apan misamot ang iyang kalagot dihang nasuta niya nga anaa pa si Liz sulod sa lawak ni Kuya Evan niya. Mihinay si Destiny pagsulod sa iyang kuwarto nga nagpangusmo. Wala gyud siya’y gusto ni Liz nga maoy mahimong hinigugma sa iyang maguwang. Wala siya makauyon sa kinaiya niini. -- Sumpayan pa