Gula 89
Kay diha na man gayod siya sa tugkaran, siya na lang ang miabli sa gate. Apan nakugang siya pagkakita sa nahiabot nga bisita.
“Good morning, Miss Diolan,” matud ni Bradley nga mapahiyomon. “Mahimo bang mosulod?”
“Nga-nganong dili,” niya pa nga ingon sa kalit lang gikulbaan, kakulba nga naghatod og gilok nga pagbati sa iyang kahiladman.
Misulod si Bradley nga nagkalibhay sa dala niining travelling bag.
Gidala ni Sandra si Bradley ngadto sa sementong lingkoranan sa lagwerta aron adto kini abi-abiha. Nanglingkod sila.
“Gisurpresa ko nimo, Bradley,” ni Sandra pa. Giunsa nimo pagtultol ang among pinuy-anan?”
“Walay dapit nga dili matultolan, Sandra,” ni Bradley pa,” kun gugma na ang magsugo.”
Wala motingog si Sandra.
“Nia ko, Sandra,” matud ni Bradley,“aron hagdon ka nga magpakasal kita.”
“Unsa?” Nakugang si Sandra. “Dili, Bradley. Dili ko makahimo sa pag-ilog sa kalipay ni Debra.”
“Wa na si Debra,” ni Bradley pa.
Ug gisuginlan si Sandra ni Bradley mahitungod sa paghikog ni Debra. -- Taposon sunod gula