"Ikaw ug Ako"

Ang nakadaug sa ikatulong ganti! Fel Morales!" matud sa MC nga nagbarog sa bantawan nga nag-atubang sa San Sebastian Parish. Nitindog dayon si Fel nga diha ra naglingkod sa laray sa lingkuranan ibabaw sa bantawan. Niduol siya sa MC ug gidawat iyang premyo nga dos mil pesos. Naminghoy ko nga nagbarog ubos sa bantawan uban sa daghang mga nanan-aw sa bangga sa awit karong sayong gabii. Gihipos nako akong gitara. Gihinay ko'g sulod sa sudlanan niini nga leatherette nga itom. Nipasiklap ko ni Edith, akong manghod nga usa sa mga contestants. Naglingkod pa siya ibabaw sa bantawan uban sa tanang mga contestants. Naglingolingo ko.

Akong gipasabot niya pagkahuman sa contest nga maayo na la'g makakuha siya'g ikatulong ganti. Kay maayong manganta iyang mga kasangka. Naghulat na lang ko nga matawag ang ikaduhang ganti og dayon ang unang ganti. Unya mopauli na mi ni Edith.

Nag-inangat ang pista sa among lungsod sa San Sebastian. Karon, nga bisperas, gipasiugdahan ang amateur singing contest. Akong gipasalmot si Edith. Kami ra mang duha ang managsoon. Unya ako ang tigduyog niya kun mokanta. Puro mi hilig og awit. Apan lupig ko ni Edith. Kay may pagkayabag man ko. Unya mokurog sab atubangan sa daghang tawo.

Duna hinoon koy sinulat nga awit nga nauyonan ni Edith. "Nindot nang kantaha Noy Rudy, da! Ako nang tun-an. Kay kantahon ko na kun dunay contest," niya pa usa ka higayon nga nadungog niyang gikanta ko sa amo ang "Ikaw Ug Ako." Usa ka kantang mahay sa gugma. Nalipay ko nga nakauyon siya's sinulat kong awit. May musical quality gyud diay akong awit.

Grade five na ko nisugod og hilig sa kantakanta. Si Edith grade one pa pakantahon na siya sa mga maestro sa eskuylahan kun dunay mga programa. Layo among distansiya sa edad. Kay pagka grade one ni Edith, grade five na ko.

Nahinumdum ko nga usa ka higayon sa pista sa among baryo sa Kintolimbo. Tungod sa galgal sa uban nakong mga hgiala (basin ang tuyo nga maulawan lang ko), niapil ko'g singing contest. Natural, niapil sab akong manghod. Ang nakaparat kay ako'y unang natawag nga pakantahon. Nagkurog na daan akong tuhod nga naglakaw saka sa bantawan. Ang akong gikanta "All My Love" nga gipasikat ni Cliff Richard. Kaupat ko magsugod kay wa katumong dayon sa duyog. Si Edith nikanta og "Last Waltz". Nibilib ang katawhan niya. Nanghugyaw ug namakpak. Siya ang nakakuha sa unang ganti. Ako way ganti. Kundi bugalbugal sa akong mga higala.

Apan gidasig lang gihapon ko ni Papa Dante, clerk sa Register of Deeds sa Kapitolyo. Gipalitan ko'g sista. Dangtag tulo ka tuig, nakat-on ko'g pangaskas. Unya nakasulat og awit.

"Arang-arang na kang paminawon Dong Rudy," honghong ni Mama Nena, usa ka maestra, usa ka buntag dihang gikanta nako akong komposisyon. Nakapahiyom ko. Hapit nitulo akong luha sa kalipay. Kay si mama mismo ang moabag nako kun sabaan siyas akong tingog.

"Ang nakadaug sa ikaduhang ganti! Si Alma de Gracia!" sa MC. Naputol akong paghanduraw. Namakpak ang mga tawo. Gilamano ni Edith sa Alma pagtindog sa naulahi. Tres mil pesos iyang premyo. Nisenyas na kong Edith nga mamauli na mi.

"Ang nakadaug sa unang ganti! Edith Espanol!" sa MC.

Daw nigahi ko's akong gibarogan. Nakalitan sab si Edith. Nanap-ong sa iyang baba. Nihugyaw ang mga tawo. Namakpak. Gilamano si Edith sa mga kasangka niya. Gilamano sab siya sa MC ug gitunolan sa mikropono. Ipakanta niya pag-usab ang "Ikaw Ug Ako". Nagwarawara ko's sista samtang nagsaka sa bantawan aron pagduyog ni Edith.

"Noy Rudy o! Imong bahin!" ni Edith samtang naglakaw mi padulong sa amo. Singko mil pesos iyang ganti. Unya gitunolan ko niya'g lima ka tag kinyentos pesos. Mapahiyomon siya. Tunga gyud diay mi.

"Salamat sis," gidawat nako. "Nakita na gyud imong abilidad nga di bastabasta."

"Di man sab bastabasta imong awit nga sinulat" niya pa. Sidlak kaayong mga mata.

"Nakadungog ko's mga nagdiskusyon sa wa pa nihukom. Ang ako kunong awit, wa pay plaka. Kay karon pa nila nadungog. Unya nindot ug mananoy kuno kaayo. Maong nagduda ko nga makaunang ganti ko. Busa, naghulat lang gyud ko sa pagtawag sa tanang nidaug," ni Edith. Di tiaw akong kalipay. (Kataposan)